Բևեռացվելիություն

Բևեռացվելիություն, արտաքին էլեկտրամագնիսական դաշտում նյութի էլեկտրական կամ մագնիսական դիպոլային մոմենտ ձեռք բերելու ֆիզիկական հատկություն։

Բևեռացվելիություն տերմինը բնութագրում է նաև ատոմի, մոլեկուլի ինդուցված դիպոլային մոմենտի գծային կախման գործակիցը բևեռայնություն ստեղծած արտաքին դաշտից, իսկ միջավայրի համար այն հանդիսանում է նրա մասնիկների միջին բևեռացվելիություն կամ դիէլեկտրական ընկալունակության հարաբերությունը միավոր ծավալում գտնվող մասնիկների թվին.։

Դասակարգում

Էլեկտրական բևեռացվելիություն

Միջավայրի էլեկտրական բևեռացվելիությունը բնութագրվում է դիէլեկտրական ընկալունակության $\chi _{e}$ մեծությամբ, որը դիէլեկտրիկի P բևեռացման և փոքր արտաքին E էլեկտրական դաշտի գծային կապն արտահայտող մեծությունն է։

${\vec {P}}=\chi _{e}{\vec {E}}$

Ընկալունակությունը կախված է դիէլեկտրիկական թափանցելիությունից (ε) հետևյալ բանաձևով

$\varepsilon =1+4\pi \chi _{e}$

Մագնիսական բևեռացվելիություն

Մագնիսական բևեռացվելիությունը բնութագրվում է մագնիսական ընկալունակության $\chi _{m}$ մեծությամբ, որը J մագնիսականության և փոքր արտաքին H մագնիսական դաշտի գծային կապն արտահայտող մեծությունն է։

${\vec {J}}=\chi _{m}{\vec {H}}$

Բևեռացվելիության թենզոր

Անիզոտրոպ բյուրեղներում էլեկտրական (մագնիսական) բևեռացվելիությունը բնութագրվում է դիէլեկտրիկ (մագնիսական) ընկալունակության $\chi _{e}^{ij}\left(\chi _{m}^{ij}\right)$ թենզորով, հետևաբար մագնիսականության վեկտորը և էլեկտրական (մագնիսական) դաշտի լարվածության վեկտորը ընդունում են հետևյալ արժեքները

$P_{i}=\chi _{e}^{ij}E_{j}$

$J_{i}=\chi _{m}^{ij}H_{j}$

Էներգիայի պահպանման օրենքից կարելի է դուրս բերել, որ $\chi _{e}^{ij}$ և $\chi _{m}^{ij}$ թենզորները սիմետրիկ են։

$\chi _{e}^{ij}=\chi _{e}^{ji}$

$\chi _{m}^{ij}=\chi _{m}^{ji}$

Իզոտրոպ բյուրեղներում թենզորի ոչանկյունագծային բաղադրիչները հավասար են զրոյի, իսկ բոլոր անկյունագծայինները իրար հավասար են։

Գրականություն

• Сивухин Д.В., Электричество, 1977

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 2, էջ 410)։