Արծվիկ Հարությունյան
Արծվիկ Հարությունյան | |
---|---|
Ծնվել է | դեկտեմբերի 22, 1929 (94 տարեկան) |
Ծննդավայր | Էջմիածնի շրջան |
Քաղաքացիություն | ԽՍՀՄ և Հայաստան |
Մասնագիտություն | գիտնական |
Կուսակցություն | ԽՄԿԿ |
Պարգևներ և մրցանակներ |
Արծվիկ Մնացականի (Մացակի) Հարությունյան (դեկտեմբերի 22, 1929, Էջմիածնի շրջան), հայ խորհրդային բամբակագործ, գյուղատնտեսական արտադրության առաջավոր։ Սոցիալիստական աշխատանքի հերոս (1951)[1]։
Կենսագրություն[խմբագրել | խմբագրել կոդը]
Արծվիկ Մնացականի Հարությունյանը ծնվել է 1929 թվականի դեկտեմբերի 22-ին Հայկական ԽՍՀ Էջմիածնի շրջանի Շահումյան գյուղում (այժմ՝ ՀՀ Արմավիրի մարզ)[2] աշխատավոր գյուղացու ընտանիքում[3]։
Միջնակարգ կրթությունը ստացել է Շահումյան գյուղի դպրոցում, որն ավարտել է 1946 թվականին։ Եղել է կոմերիտմիության անդամ[3]։ Դեռ դպրոցական տարիներին Հարությունյանը մասնակցում էր տեղի կոլտնտեսության աշխատանքներին՝ արձակուրդների ընթացքում զբաղվում էր այգեգործությամբ և բամբակագործությամբ՝ օգնելով ծնողներին[3][2]։ 1946 թվականին դպրոցն ավարտելուց հետո Հարությունյանն աշխատանքի է անցել Շաումյանի կոլտնտեսության բամբակագործական օղակում։ Գերակատարելով սահմանված արտադրական պլանները և ցույց տալով իր լավագույն կողմերը՝ 1946 թվականին Հարությունյանը նշանակվել է բամբակագործության օղակի օղակավար։ Հետևելով բամբակի աճեցման ագրոտեխնիկական կանոններին՝ Հարությունյանի օղակը ժամանակին է օգտագործել պարարտանյութը, աշխատանքներ է իրականացրել հողի փխրեցման և ոռոգման ուղղությամբ, ինչպես նաև հատուկ ուշադրություն է դարձրել մեկ հեկտար հողատարածքի համար բույսերի անհրաժեշտ քանակի ապահովմանը։ 1950 թվականից սկսած 6 հեկտար տարածքի վրա մշակվող բամբակի յուրաքանչյուր հեկտարից Հարությունյանի ղեկավարած օղակը ստացել է ռեկորդային բերք՝ 73,4 ցենտներ բարձրորակ բամբակ[4]։
ԽՍՀՄ Գերագույն խորհրդի նախագահության 1951 թվականի հուլիսի 25-ի հրամանագրով, ոռոգելի հողերում 1950 թվականին բամբակի բարձր բերք ստանալու, կոլտնտեսության կողմից բոլոր տեսակի գյուղատնտեսական մթերքների մատակարարման պայմանագրերը և ՄՏԿ-ների աշխատանքի դիմաց բնամթերային վճարումները կատարելու և 1951 թվականի գարնանացանի համար բոլոր մշակաբույսերի սերմերը ապահովելու համար Արծվիկ Հարությունյանին շնորհվել է Սոցիալիստական աշխատանքի հերոսի կոչում՝ նրան հանձնելով Լենինի շքանշան և Մուրճ ու մանգաղ ոսկե մեդալ[Նշում 1][5]։
Հետագա տարիներին Հարությունյանի օղակը շարունակել է բամբակի բարձր բերք ստանալ և հաղթել բամբակագործների մրցություններում։ 1958 թվականի փետրվարի 18-21-ը Արծվիկ Հարությունյանը մասնակցել է Բամբակագործների համամիութենական համաժողովին[6]։ Նույն թվականին ընդունվել է ԽՄԿԿ շարքերը[7]։ 1959 թվականին Հարությունյանի ղեկավարությամբ օղակը հերթական անգամ գերակատարել է բամբակի բերքի պետությանը հանձնելու նախատեսված պլանները[6]։ Բարձր արդյունքների հասնելու համար Հարությունյանը պարգևատրվել է «Աշխատանքային արիության համար» և «Աշխատանքային ձեռքբերումների համար» մեդալներով, ինչպես նաև ԽՍՀՄ ԺՏՆՑ-ի ոսկե և արծաթե մեդալներով[8]։
Արծվիկ Մնացականի Հարությունյանը նաև ակտիվ հասարակական գործունեություն է ծավալել։ Ընտրվել է ՀԽՍՀ Գերագույն խորհրդի IV-V գումարումների պատգամավոր Շահումյանի թիվ 193 ընտրատարածքից[9]։ ՀԿԿ Կենտկոմի 23-րդ (1961) և 24-րդ (1964) պլենումներում Արծվիկ Հարությունյանն ընտրվել է ՀԿԿ Կենտկոմի անդամության թեկնածու[2]։ Եղել է Հայաստանի կոմերիտմիության Կենտկոմի անդամության թեկնածու, Հայաստանի կոմերիտմիության Էջմիածնի շրջանային կոմիտեի անդամ[7]։ Հարությունյանը եղել է նաև ԽՍՀՄ խաղաղության կոմիտեի անդամ[10], ԽՄԿԿ XXII համագումարի պատվիրակ[11]։
Պարգևներ[խմբագրել | խմբագրել կոդը]
- Սոցիալիստական աշխատանքի հերոս (ԽՍՀՄ Գերագույն խորհրդի նախագահության 1951 թվականի հուլիսի 25-ի հրամանագիր, Լենինի շքանշան և Մուրճ ու մանգաղ մեդալ)՝ 1950 թվականին բամբակի բարձր բերք ստանալու, կոլտնտեսության կողմից բոլոր տեսակի գյուղատնտեսական մթերքների մատակարարման պայմանագրերը և ՄՏԿ-ների աշխատանքի դիմաց բնամթերային վճարումները կատարելու և 1951 թվականի գարնանացանի համար բոլոր մշակաբույսերի սերմերը ապահովելու համար[5]։
- Մեդալ «Աշխատանքային արիության համար» (03/07/1960)[5][8]։
- «Աշխատանքային արժանիքների համար» մեդալ[8]։
- ԽՍՀՄ ԺՏՆՑ-ի ոսկե մեդալ[8]։
- ԽՍՀՄ ԺՏՆՑ-ի արծաթե մեդալ[8]։
Նշումներ[խմբագրել | խմբագրել կոդը]
- ↑ ԽՍՀՄ Գերագույն խորհրդի նախագահության հրամանագրում նշվում է «Մացակովնա» հայրանունը։
Ծանոթագրություններ[խմբագրել | խմբագրել կոդը]
- ↑ Лица, удостоенные почётных званий СССР. Герои Социалистического Труда // Армянская советская энциклопедия / Виктор Амазаспович Амбарцумян. — Ер., 1987. — Т. 13. Советская Армения. — С. 666. — 688 с.
- ↑ 2,0 2,1 2,2 Авагян, 2004, էջ 82
- ↑ 3,0 3,1 3,2 Герои Социалистического Труда Армении, 1960, էջ 100
- ↑ Герои Социалистического Труда Армении, 1960, էջ 100—101
- ↑ 5,0 5,1 5,2 Արծվիկ Հարությունյան «Երկրի հերոսներ» կայքում
- ↑ 6,0 6,1 Герои Социалистического Труда Армении, 1960, էջ 102
- ↑ 7,0 7,1 Герои Социалистического Труда Армении, 1960, էջ 103
- ↑ 8,0 8,1 8,2 8,3 8,4 Авагян, 2004, էջ 83
- ↑ Герои Социалистического Труда Армении, 1960, էջ 99—100
- ↑ Авагян, 2004, էջ 82—83
- ↑ XXII съезд Коммунистической Партии Советского Союза. Стенографический отчет. — М.: Госолитиздат, 1962. — Т. 3. — С. 371. — 592 с.
Գրականություն[խմբագրել | խմբագրել կոդը]
- Авагян С. Арутюнян Арцвик Мнацакановна // Известные армяне в сельском хозяйстве = Գյուղատնտեսության հայ նշանավորները. — Ер.: «Зангак-97», 2004. — Т. 2. — С. 82—83. — 248 с.
- Саакян В. М., Геворкян В. А. Арутюнян Арцвик Мнацакановна // Герои Социалистического Труда Армении = Հայաստանի սոցիալիստական աշխատանքի հերոսները. — Ер.: Айпетрат, 1960. — С. 99—103. — 325 с.
Արտաքին հղումներ[խմբագրել | խմբագրել կոդը]
|
- Դեկտեմբերի 22 ծնունդներ
- 1929 ծնունդներ
- Ապրող անձինք
- ԽՄԿԿ անդամներ
- Սոցիալիստական աշխատանքի հերոսներ
- Լենինի շքանշանի ասպետներ
- «Աշխատանքային արիության համար» մեդալակիրներ
- Անձինք այբբենական կարգով
- Հայկական ԽՍՀ Գերագույն Խորհրդի 5-րդ գումարման պատգամավորներ
- Հայկական ԽՍՀ Գերագույն Խորհրդի 4-րդ գումարման պատգամավորներ
- ԽՄԿԿ 22-րդ համագումարի պատվիրակներ