Ալֆի Ալեն

Ալֆի Ալեն Alfie Allen
Ծնվել է	սեպտեմբերի 12, 1986(1986-09-12) (36 տարեկան)
Ծննդավայր	Համմերսմիթ, Համերսմիթ և Ֆուլեմ, Մեծ Լոնդոն, Անգլիա, Միացյալ Թագավորություն
Քաղաքացիություն	Միացյալ Թագավորություն
Կրթություն	St John's College?, Fine Arts College? և Windlesham House School?
Մասնագիտություն	դերասան, թատրոնի դերասան, կինոդերասան և հեռուստատեսային դերասան
Ծնողներ	հայր՝ Կիթ Ալլեն, մայր՝ Ալիսոն Օուեն
Alfie Allen Վիքիպահեստում

Ալֆի Ալեն (անգլ.՝ Alfie Allen, սեպտեմբերի 12, 1986(1986-09-12), Համմերսմիթ, Համերսմիթ և Ֆուլեմ, Մեծ Լոնդոն, Անգլիա, Միացյալ Թագավորություն), անգլիացի դերասան։ Առավել հայտնի է «Գահերի խաղ» հեռուստասերիալում Թեոն Գրեյջոյի դերով։

Ալֆի Ալենը ծնվել է Համերսինի շրջանում, Լոնդոն։ Պրոդյուսեր Էլիսոն Օուենի և կատակերգակ ու դերասան Կիտա Ալենի որդին է։ Նրա մեծ քույրը Լիլի Ալենն է, անգլիացի երգչուհի և երգերի հեղինակ, նրա մասին գրել է «Ալֆի» երգը, որը Alright, Still դեբյուտային ալբոմի տասնմեկերորդ երգն է։ Սովորել է Պորտսմութի St Johns College դպրոցում և Համփսթեդի գեղարվեստի քոլեջում։ 2002 թվականից մինչև 2010 թվականի ապրիլը հանդիպել է անգլիացի դերասանուհի Ջեյմի Ուինսթոնի հետ։ Այժմ նրա ընկերուհին մոդել Այոնա Էլիզաբեթն է։

Գործունեություն

1988 թվականին The Comic Strip Presents սերիալում խաղացել է իր առաջին դերը։ Այնուհետև 10 տարվա ընդմիջումից հետո 1998 թվականին նա հանդես է եկել Channel 4-ում նկարահանվող Ռիչարդ Լուկասի և Դեյվիդ Ուիլյամսի համահեղինակած «Դուք այստեղ եք» հեռուստատեսային կատակերգությունում։ Նրա հայրը՝ Կիտ Ալենը, Սալի Ֆիլիպսը և Ջոն Ռոնսոնը ևս մասնակցել էին ֆիլմի ստեղծմանը։ Օուեն-Ալենը իր քույր Լիլիի հետ փոքր դերով նկարահանվել է 1998 թվականի «Եղիսաբեթ» ֆիլմում, որի պրոդյուսերը նրանց մայրն էր։

Հետագայում դեռահասի դեր է խաղացել «Ալեն Կարի՝ ծխել թողնելու հեշտ ձևը» ֆիլմում։

Այնուհետև նկարահանվել է «Կոդի Բենքս գործակալը 2» (որի ռեժիսորը նրա հորեղբայր Քեվին Ալենն էր) և Իեն Մակյուենի գրքի էկրանավորում «Քավություն» ֆիլմերում։ BBC1 հեռուստաընկերության Casualty 1907 պատմական դրամայում խաղացել է Նոբի Կլարկի դերը։

2008 թվականի հունվարի 31-ից Չիչեսթրում փոխարինել է Դենիել Ռեդքլիֆին Equus պիեսում՝ հյուրախաղերով հանդես գալով ամբողջ երկրում։

2009 թվականի ապրիլին Ուինսթոնի հետ նկարահանվել է Madness խմբի «Dust Devil» երգի տեսահոլովակում։ Խաղացել է նաև BBC2-ի Freefall հեռուստասերիալում։

2009 թվականի օգոստոսին հայտնի դարձավ, որ Ալենը HBO-ի «Գահերի խաղ» հեռուստասերիալում խաղալու է Թեոն Գրեյջոյի դերը. ֆիլմը նկարահանված է Ջորջ Մարտինի «Սառույցի և կրակի երգը» գրքաշարի հիման վրա։

Ֆիլմագրություն

Տարի	Ֆիլմ	Դեր	Նշումներ
1998	Դուք այստեղ եք
1998	Էլիզաբեթ	Արունդելի որդի
2004	Կոդի Բենքս գործակալը 2	Բերքեմփ
2007	Քավություն	Դենի Հարդման
2008	Անհաջողակի հիշողություններ	Քևին Հաբլ
2008	Պատահար 1907	Նոբի Կլարլ	հեռուստասերիալ
2008	Եվս մեկը Բոլեյնների տոհմից	թագավորի մունետիկ
2009	Ազատ անկում	Իեն
2010	Հոգով տղան	Ռուս Մաունթջոյ
2010	Երեխան	Դոմինիկ
2010	Ֆրիսթայլ	Ջեզ
2010	Փոշի	Ուիզեր
2011–այժմ	Գահերի խաղ	Թեոն Գրեյջոյ	հեռուստասերիալ
2012	Սահմանագիծ	Հենրի
2014	Պլաստիկ	Յաթսի
2014	Ջոն Ուիք	Իոսիֆ Տարասով