Ալյոշա Գաբրիելյան
Ալյոշա Գաբրիելյան | |
---|---|
Ծնվել է | հունվարի 1, 1948 (76 տարեկան) |
Կրթություն | Հայկական պետական մանկավարժական համալսարան |
Մասնագիտություն | քաղաքական գործիչ |
Ալյոշա Գրիգորիի Գաբրիելյան (հունվարի 1, 1948), արցախցի քաղաքական գործիչ, Արցախի Հանրապետության Ազգային ժողովի վեցերորդ գումարման պատգամավոր՝ «Հայ Հեղափոխական դաշնակցություն» կուսակցությունից[1]։
Կենսագրություն[խմբագրել | խմբագրել կոդը]
Ալյոշա Գաբրիելյանը ծնվել է 1948 թվսականի հունվարի 1-ին, Ասկերանի շրջանի Վերին Ղլիժբաղ գյուղում։ 1966 թվականին ավարտել է Ասկերանի շրջանի Խնապատ գյուղի միջնակարգ դպրոցը։ 1967-1971 թվականներին սովորել է Երևանի Խ. Աբովյանի անվան պետական մանկավարժական ինստիտուտի ֆիզիկայի ֆակուլտետում։ 1971-1972 թվականներին որպես ֆիզիկայի ուսուցիչ աշխատել է Արտաշատի շրջանի Վերին Արտաշատ գյուղի միջնակարգ դպրոցում։
1972-1973 թվականներին ծառայել է ԽՍՀՄ Զինված ուժեր։
1973-1978 թվականներին աշխատել է Ասկերանի շրջանի Խրամորթ գյուղի միջնակարգ դպրոցում, եղել է ֆիզիկայի, այնուհետև՝ ռազմագիտության ուսուցիչ։
1978 թվականի սեպտեմբերին նշանակվել է Ասկերանի շրջանային գործադիր իշխանության կրթության բաժնի մեթոդկաբինետի վարիչ, 1987 թվականի փետրվարին՝ Ասկերանի շրջանային գործադիր իշխանության կրթության բաժնի վարիչ։
1991 թվականի ապրիլին Ալյոշա Գաբրիելյանը ընտրվել է ժողովրդական պատգամավորների Ասկերանի ավանային խորհրդի գործկոմի նախագահ։ 1991 թվականի դեկտեմբերի 28-ին Ասկերանի թիվ 32 ընտրատարածքից ընտրվել է Արցախի առաջին գումարման Գերագույն խորհրդի պատգամավոր։ Մեկ տարի անց նշանակվել է Արցախի կառավարության լիազորված ներկայացուցիչ Ասկերանի շրջանում։
1994 թվականի դեկտեմբերից եղել է Ասկերանի միջնակարգ դպրոցի զինղեկ, այնուհետև՝ առաջին կարգի մասնագետ` կրթության Ասկերանի շրջանային բաժնում։ 1998 թվականի հունվարին Ալյոշա Գաբրիելյանը նշանակվել է նոր կազմակերպված շրջանային մանկապատանեկան մարզադպրոցի տնօրեն։
2000 թվականի հունիսի 18-ին ընտրվել է երրորդ գումարման Ազգային ժողովի պատգամավոր, եղել է սոցիալական ոլորտի մշտական հանձնաժողովի փոխնախագահ։ 2009 թվականին Ալյոշա Գաբրիելյանը ընտրվել է Ասկերանի քաղաքային համայնքի ղեկավար, նույն պաշտոնում վերընտրվել է 2013 թվականի ապրիլին։
2015 թվականի մայիսի 3-ի խորհրդարանական ընտրություններում ընտրվել է Արցախի Հանրապետության 6-րդ գումարման ԱԺ պատգամավոր` համամասնական ընտրակարգով, «Հայ Հեղափոխական դաշնակցություն» կուսակցության ընտրացուցակով, եղել է Ազգային ժողովի արտադրության և արտադրական ենթակառուցվածքների մշտական հանձնաժողովի նախագահի տեղակալ, «Դաշնակցություն» խմբակցության քարտուղար[2]։
Ամուսնացած է, ունի երեք զավակ։