Վիլհելմ Ավագյան
- Վիքիպեդիայում կան հոդվածներ Ավագյան ազգանունով այլ մարդկանց մասին։
| Վիլհելմ Ավագյան | |
|---|---|
| Ծնվել է | 1920 |
Վիլհելմ Շամիրի Ավագյան (ծնվ.՝ 1920, Նորաշեն, Հայկական ԽՍՀ), հայ մանկավարժ, Երկրորդ համաշխարհային պատերազմի մասնակից[1]։
Կենսագրություն
[խմբագրել | խմբագրել կոդը]Ծնվել է 1920 թվականին։ 1939 թվականին ավարտել է Բերդի միջնակարգ դպրոցը և նույն տարում ընդունվել Երևանի Խ. Աբովյանի անվան հայկական մանկավարժական ինստիտուտի աշխարհագրական ֆակուլտետը։ Ութ օր ուսանողական նստարանին նստելուց հետո, 1939 թվականին զորակոչվել է խորհրդային բանակ։ 1939 թվականից մինչև Հայրենական մեծ պատերազմի սկիզբը ծառայել է Արևմտյան Բելառուսում, Բալոստոկ քաղաքի մոտ գտնվող Վոսիլկովո բնակավայրում տեղավորված 243-րդ գնդում որպես հրետանավոր[1]։ Պատերազմի սկսվելու երկրորդ օրը Վիլեյսկայա մարզի (Արևմտյան Բելառուս) Գոլշանի ավանից ետ նահանջելուց հետո, 1941 թվականի աշնանից մինչև պատերազմի վերջը եղել է Արևմտյան, իսկ հետո 3-րդ բելառուսական ռազմաճակատի շտաբների պաշտպանության 6-րդ առանձին գումարտակի կազմում եղած հրետանային հաշվարկում։ 1941 թվականի սեպտեմբերից մինչև 1942 թվականի ապրիլը Վիլհելմ Ավագյանը մասնակցել է Մոսկվայի պաշտպանության համար ծավալված մարտերին, որից հետո մարտկոցի կազմում անցել է իր նախկին պարտականությունների կատարմանը[1]։
1944-1945 թվականներին 3-րդ բելառուսական զորքերի կազմում Վիլհելմ Ավագյանը մասնակցել է Բելառուսի, Լիտվայի, Արևմտյան Պրուսիայի ազատագրման համար մղված մարտերին։ 1944 թվականին անցել է ԽՄԿԿ շարքերը որպես թեկնածու, իսկ 1946 թվականին՝ անդամ։ Մարտական ծառայությունների համար պարգևատրվել է Մոսկվայի պաշտպանության համար, 1941-1945 թվականների Հայրենական մեծ պատերազմում Գերմանիայի դեմ տարած հաղթանակաի համար, Քյոնիգսբերգի ազատագրության համար, Մարտական ծառայության համար և մի շարք հոբելյանական մեդալներով[1]։
1946 թվականի մայիսին զորացրվել է։ 1946-1950 թվականներին սովորել և ավարտել է Երևանի Խաչատուր Աբովյանի անվան մանկավարժական ինստիտուտի աշխարհագրության ֆակուլտետը և անցել մանկավարժական աշխատանքի Մարտունու շրջանում[1]։
1953 թվականին կրկին զորակոչվել է բանակ և ծառայել մինչև 1955 թվականի որպես սակրավորների վաշտի քաղղեկ, լեյտենանտի զինվորական կոչումով։ Հետագայում զորացրվել և աշխատանքի է անցել Հրազդանի շրջանի դպրոցներում։ 1958 թվականից աշխատում է Նորաշենի Փաշո Ավագյանի անվան միջնակարգ դպրոցում որպես պատմության ուսուցիչ։ 1962 թվականից մինչև 1968 թվականը սովորել և ավարտել է Հայկական հեռակա մանկավարժական ինստիտուտի պատմության ֆակուլտետը[1]։