Պյութագորաս Հռգիոնցի (հուն․՝ Πυθαγόρας ο Ρήγιος, մ.թ.ա. 6-րդ դար, Սամոս, Հյուսիսային Եգեյան կղզիներ, Հունաստան - մ.թ.ա. 5-րդ դար), հույն քանդակագործ։ Ստեղծագործել է մ․ թ․ ա․ V դ․ 1-ին կեսին Հռեգիոնում (Հվ․ Իտալիա)։ Կերտել է հաղթող-աթլետների քանդակներ։ Աշխատանքները (բոլորն էք բրոնզից) չեն պահպանվել։ Նրա «Կաղ Փիլոկտետեսը» հայտնի է Լուվրում գտնվող գեմմայից և մարմարյա իրանի քանդակից (հռոմ․ պատճեն, սկզբում՝ Վալենտինիի պալացցո, Հռոմ)։ Օ․ Ֆ․ Վալդհաուերի կողմից «Հակինթոս» (այսպես կոչված՝ «էրոտ Սորանցո», էրմիտաժ, Լենինգրադ) քանդակը Պյութագորասին վերագրելը համընդհանուր ընդունելություն չի գտել։
Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 9, էջ 339)։