Բուրգասի տարածաշրջանային թանգարան

Բուրգասի տարածաշրջանային թանգարան
Տեսակ	թանգարան
Երկիր	Բուլղարիա
Ժանր	ազգագրություն

Բուրգասի տարածաշրջանային թանգարան (բուլղար․՝ Регионален исторически музей Бургас), տարածաշրջանային պատմական թանգարան Բուրգասում։ Համարվում է Բուլղարիայի հարավ-արևելքի ամենամեծ թանգարանը^[1]։

Պատմություն

Ստեղծվել է 1912 թվականին որպես մասնավոր հնագիտական թանգարան՝ Բուրգասի «Debelt» հնագիտական ընկերության հենքի վրա։ Հնագիտական ընկերության առաջին նախագահն է եղել Բուրգասի տարածաշրջանի ղեկավար Հրիստո Բոգոևը, թանգարանի առաջին տնօրենն է եղել Պոլ Վոդենիչարովը։ Հետագա 30 տարիների ընթացքում հավաքագրվել են թանգարանային առաջին հավաքածուները՝ եզակի հնագիտական և ազգագրական արժեքները։ 1946 թվականին թանգարանը հանձնվել է քաղաքապետարանի ենթակայությանը և կոչվել է Բուրգասի ժողովրդական թանգարան։ Տնօրեն է նշանակվել երիտասարդ գիտնական, հնագետ Իվան Գալաբովը (1918-1978), ով դրել է Բուրգասի տարածաշրջանի ժամանակակից գիտության և հնագիտության հիմքերը։ Ավելի ուշ, նա դարձել է Վելիկո Տիռնովո Կյուրեղ և Մեթոդիոս և Զալցբուրգի համալսարանների պրոֆեսոր։

1953 թվականին թանգարանը ընդլայնվել է՝ դառնալով մարզային թանգարան, այնուհետև վերածվել է Մշակութային և պատմական ժառանգության տարածաշրջանային վարչության, 2000 թվականից՝ Բուրգասի մարզի տարածաշրջանային թանգարան, որը կազմակերպում է հետազոտություններ և մշակութային ժառանգության ուսումնասիրություն տարածաշրջանում։ Թանգարանն ունի մշակութային ժառանգության ֆոնդ, որը ներկայացնում է այցելուներին։