Հայրենական մեծ պատերազմ։ 1945 թվականին։ Մարտեր են ընթանում Դանուբի ափին տեղակայված քաղաքի համար։ Գետը ականապատված է գերմանացիների կողմից, և դա կաշկանդում է խորհրդային զորքերի գործողությունները։ Բացի այդ, միլիոնանոց բնակչությամբ քաղաքը մնացել է առանց պարենի։ Իսկ հոսանքով դեպի ներքև կանգնած են խորհրդային պարենամթերքով բարժերը։ Հրամանատարությունը մի խումբ հետախույզների հանձնարարում է բարդ և վտանգավոր գործողություն՝ թշնամուց վերցնել գետի ականապատ հատվածների քարտեզը, ինչի համար պահանջվում է ներթափանցել գերմանացիների կողմից գրավված քաղաք։
Ժամանակին ֆիլմը եղել է վարձույթի առաջատար (1969, 1557 պատճեն, 10-րդ տեղ)՝ 35 մլն հանդիսատես։
Հիմնված է իրական իրադարձությունների վրա։ Դանուբի նավատորմի հետախուզական ջոկատի նախկին հրամանատար Վիկտոր Կալգանովը՝ «Մորուք» մականունով, դարձել է ֆիլմի ստեղծողների խորհրդատուն։
Ֆիլմը նկարահանվել է Կալինինգրադում և Ռիգայում։ Որպես Դանուբ հանդես է գալիս Պրեգոլյա գետը։ Ֆիլմի կադրերում երևում են Կալինինգրադի այնպիսի օբյեկտներ, ինչպիսիք են Լյութերի կիրկան, Պրեգոլյայի վտակներից մեկի Նոր կամրջի կամրջային տունը, Մայր Տաճարի ավերակները, մասնակի՝ նավահանգստի կառույցները։
Ալեքսեյ Սմիրնովը, որը կատարում է հետախույզի դեր, եղել է պատերազմի ժամանակ փորձառու հետախույզ։