Տերևաթափ թուփ է՝ մինչև 3,5 մ բարձրությամբ, ուղղաձիգ հոռաշիվերով և կողմնային անկյունավոր, դեղնավուն, ավելի ուշ՝ մոխրագույն ճյուղերով։ Բողբոջները կարմիր են կամ գորշ, մինչև 1,5 մմ երկարությամբ, սրածայր։ Տերևները էլիպսաձև են կամ հակառակ-ձվաձև, մինչև 12 սմ երկարությամբ և 5 սմ լայնությամբ, եզրերին մանր փշաատամնավոր, ներքևից՝ վառ դեղնավուն, վերևից՝ անփայլ։ Փշիկները դեղնավուն են, սովորաբար 3 ճյուղանի, մինչև 3 սմ երկարությամբ, հոռաշիվերի վրա ավելի երկար։ Միայն ընձյուղների վրա երբեմն փշիկները ունենում են 4 — 5, հազվադեպ 7 ճյուղեր։ Մացառային ճյուղերի վրա ներքին փշիկները տերևանման լայնացած են։ Հուրանները ունեն մինչև 10 սմ երկարություն, կազմված 10—25 ծաղիկներից, որոնք դեպի ցած են հակված։ Հատապտուղները էլիպսաձև են, մոտ 1 սմ երկարությամբ, վառ-կարմրավուն։ Սերմերը եթե հատապտղի մեջ մեկական են, ապա ձվաձև են, իսկ եթե 2-ական են, ապա սերմի մի կողմը տափակ է։ Ծաղկում է մայիսին, պտուղները հասունանում են սեպտեմբեր-հոկտեմբերին։
Տարածված է Հեռավոր Արևելքում (Պրիմորիեի երկրամասում), Հյուսիսային Չինաստանում։ Աճում է անտառների եզրերին, բացատներում, լեռնային գետերի ափերին, քարքարոտ հողերում։ Հայաստանի պայմաններում լավ է կլիմայավարժվել։ Հանդիպում է Երևանում, Սևանում, Վանաձորում, Իջևանում։ Ամենուրեք երաշտադիմացկուն է, շոգադիմացկուն, պահանջկոտ չէ հողի նկատմամբ։ Սևանում միանգամայն ձմեռադիմացկուն է։