Կապուտակ եռաբլթակ

Կապուտակ եռաբլթակ
Դասակարգում
Թագավորություն	Բույսեր (Plantae)
Ենթատիպ	Սերմնավոր բույսեր (Spermatophytes)
Կարգ	Հովանոցածաղկավորներ (Apiales)
Ընտանիք	Նեխուրազգիներ (Apiaceae)
Ենթաընտանիք	Նեխուրայիններ (Apioideae)
Տրիբա	Scandiceae
Ենթատրիբա	Daucinae
Ցեղ	Կապուտակ եռաբլթակ (Laser) G.Gaertn., B.Mey. & Scherb., 1799

Կապուտակ եռաբլթակ (լատին․՝ Laser trilobium), նեխուրազգիների ընտանիքին պատկանող դեղաբույս։

Նկարագրություն

170 սմ բարձրությամբ, գլանաձև մերկ ցողունով և փետրաձև մասնատված տերևներով բազմամյա խոտաբույս է։ Արմատավզիկը ծածկված է չորացած տերևների մնացորդներով։ Երկար կոթուններով արմատամերձ տերևները խոշոր են, իսկ նստադիր, եռամասնյա, աղեղնաեզր ցողունայինները՝ փոքր։ Տերևների վերին մակերեսը կանաչ է, իսկ ստորինը՝ գորշակապույտ։ Խոշոր, բազմաճառագայթ, երկարակոթ հովանոցներում հավաքված ծաղիկները սպիտակ կամ կարմրավուն են։ Կողավոր պտղիկներից կազմված հարթ պտուղները երկարավուն են։

Տարածվածություն

Աճում է ստորին լեռնային գոտու անտառներում, թփուտներում։ Հանդիպում է Լոռու, Սյունիքի մարզերում և Արցախում։ Գեղազարդային և մեղրատու բույս է։

Նշանակություն

Բուժական նպատակներով օգտագործում են խոտային մասը, արմատներն ու պտուղները։ Պտուղներից պատրաստված եփուկը խթանում է նյարդային համակարգի գործունեությունը, ունի նաև հիպոտենզիվ ազդեցություն։

Ծանոթագրություններ

Վիքիցեղերն ունի նյութեր, որոնք վերաբերում են «Կապուտակ եռաբլթակ» հոդվածին։

Վիքիպահեստն ունի նյութեր, որոնք վերաբերում են «Կապուտակ եռաբլթակ» հոդվածին։