Խաչատուր Դեովլեթյան
Ծնվել է | 1868 |
---|---|
Ծննդավայր | Անկարայի նահանգ, Կեսարիա |
Մահացել է | 1915 |
Ազգություն | հայ |
Կրթություն | Էվերեկի ազգային վարժարան Կ. Պոլսի Օսմանյան կայսերական բժշկական վարժարան |
Մասնագիտություն | բժիշկ |
Աշխատավայր | Սեբաստիայի զինվորական հիվանդանոց |
Խաչատուր Դեովլեթյան (Տէվլեթյան Խաչիկ) (1868, Անկարայի մարզ, Թուրքիա - 1915), հայ բժիշկ։
Կենսագրություն[խմբագրել | խմբագրել կոդը]
Խաչատուր Դեովլեթյանը ծնվել է 1868 թվականին, Կեսարիայի գավառի Էվերեկ գավառակի կենտրոն Էվերեկ ավանում, որի վաճառականությունը, ճարտարարվեստն ու կրթությունը հայերի ձեռքին էին։ Հայրը՝ Դեովլեթ աղան, հայտնի վաճառական էր և առևտրական կապերով կապված էր Կեսարայի ու Կարինի հետ (ըստ Ալպոյաճյանի՝ վիրաբույժ էր)։ Նախնական կրթությունն ստացել է Էվերեկի ազգային վարժարանում։
Այնուհետև ավարտել է Մարզվանի Անատոլիա քոլեջը, ապա՝ Կ. Պոլսի Օսմանյան կայսերական բժշկական վարժարանը։ Այնուհետև մեկնել է ԱՄՆ և Փենսիլվանիայի համալսարանի (Ֆիլադելֆիա քաղաք) բժշկական ֆակուլտետում ուսանել, մասնագիտացել վիրաբուժության գծով և գործնական հմտություններ ստացել տեղի հիվանդանոցում։
Վերադառնալով ծննդավայր, եղել է տեղի միակ բժիշկը և կարճ ժամանակում հմուտ վիրաբույժի և սիրված ազգային գործչի համբավ ձեռք բերել։ 1914 թվականին, Առաջին համաշ խարհային պատերազմն սկսվելուն պես զորակոչվել է օսմանյան բանակ և զինվորական բժիշկ-վիրաբույժ ծառայել Սեբաստիայի զինվորական հիվանդանոցում։ 1915 թվականի հուլիսի 14-ին, Սեբաստիայից տարագրության ճանապարհին՝ Դերինդերեում («Խորը ձոր»), Սեբաստիայի նահանգապետ Մուամմերի հրահանգով սպանվել է չարչարանքների ենթարկվելով՝ 47 տարեկանում։
Աղբյուրներ[խմբագրել | խմբագրել կոդը]
- Հարություն Մինասյան, Օսմանյան կայսրությունում և Թուրքիայի Հանրապետությունում բռնաճնշումների և ցեղասպանության ենթարկված հայ բժիշկներ, Երևան, «Լուսաբաց», 2014 — 520 էջ։
Գրականություն[խմբագրել | խմբագրել կոդը]
- Հայ բժշկութեան տուած զոհերը, ցուցակագրուած վաւերական փաստերով, Կ. Պոլիս, 1919։
- Ալպօյաճեան Ա., Պատմութիւն հայ Կեսարիոյ, հ.Բ. Գահիրէ, 1937։
- Կարոյեան Գասպար, Մեծ Եղեռնի նահատակ հայ բժիշկները (անոնց պատգամները), Պոսթոն, 1957։
- Հին եւ նոր Կեսարիա։ Յուշամատեան, Փարիզ, 1989։
- Շահբազյան Հ., Միրզոյան Ա., Ցուցակ Հայոց ցեղասպանության զոհերի (1915-1923 թթ.), հ. 3, Անկարայի նահանգ, Երևան, 2006։