Իգնատիոս Եփրեմ Երկրորդ

Վիքիպեդիայից՝ ազատ հանրագիտարանից
Jump to navigation Jump to search
Իգնատիոս Եփրեմ Երկրորդ
Դիմանկար
Ծնվել էմայիսի 3, 1965(1965-05-03) (55 տարեկան)
ԾննդավայրԱլ-Կամիշլի, Սիրիա
ՔաղաքացիությունFlag of Syria.svg Սիրիա
ԿրոնԱրևելյան ուղղափառ եկեղեցիներ
ԿրթությունMaynooth University?
Մասնագիտությունքահանա
Զբաղեցրած պաշտոններSyriac Patriarch of Antioch?
Ignatius Aphrem II Վիքիպահեստում

Մորան Մոր Իգնատիոս Եփրեմ Երկրորդ (արամեերեն՝ ܐܝܓܢܐܛܝܘܣ ܐܦܪܝܡ ܬܪܝܢܐ ܟܪܝܡ, մայիսի 3, 1965(1965-05-03), Ալ-Կամիշլի, Սիրիա), Ասորի Ուղղափառ եկեղեցու պետ և Անտիոքի և համայն Արևելքի պատրիարք (2014 թ. մարտի 31-ից)։

Կենսագրություն[խմբագրել | խմբագրել կոդը]

1977 թ. ընդունվել է Լիբանանի Աչանե քաղաքի Սբ. Եփրեմի անվան աստվածաբանական սեմինարիան։

1982-84 թթ. ծառայել է Հալեպի թեմում։

1984-88 թթ. սովորել և ավարտել է Կահիրեի Ղպտի աստվածաբանական ճեմարանը՝ աստվածաբանության բակալավրի աստիճանով։

1985 թ. դարձել է վանական և Եգիպտոսում ձեռնադրվել սարկավագ։ Նույն տարում ձեռնադրվել է կուսակրոն քահանա։

1988-89 թթ. եղել է հանուցյալ Պատրիարք Մորան Մոր Զակկա I Իվասի քարտուղարը և որպես ուսուցիչ ծառայել Դամասկոսի Սբ. Եփրեմի անվան աստվածաբանական ճեմարանում։

1991 թ. ընդունվել է Մայնութի Սբ. Պատրիկի անվան քոլեջ (Իռլանդիա)։

1992 թ. քոլեջում ստացել է ՙՍրբազան Աստվածաբանության՚ աստիճանի լիցենզիա։

1994 թ. «Խաչի խորհրդաբանությունը վաղ ասորական քրիստոնեության մեջ» թեմայի վերաբերյալ դոկտորական թեզ պաշտպանելուց հետո ստացել է աստվածաբանության դոկտորի աստիճան։

Այս ընթացքում նա իր ծառայությունն է բերել նաև Լոնդոնում որպես Ասորի Ուղղափառ Եկեղեցու փոխառաջնորդ։

1996 թ. հունվարի 2-ին օծվել է եպիսկոպոս և ստացել Մոր Կիրիլ եպիսկոպոսական անունը՝ նշանակվելով նորաբաց Ասորի Ուղղափառ Եկեղեցու Միացյալ Նահանգների Արևելյան թեմի Պատրիարքական Փոխանորդ։

1996 թ. մարտի 2-ին մեկնել է Միացյալ Նահանգներ և պաշտոնապես հաստատվել իր պաշտոնին Նյու Ջերսիի Սբ. Մարկոսի տաճարում։

1991 թ. սկսած մասնակցել է Եկեղեցիների Համաշխարհային Խորհրդի, ինչպես Կենտրոնական, այնպես էլ Գործադիր Կոմիտեներին՝ իբրև Ասորի Ուղղափառ Եկեղեցու պատվիրակության անդամ։ Նա նաև անդամակցել է ԱՄՆ-ի՝ Քրիստոսի Եկեղեցիների Ազգային Խորհրդի Գործադիր և Ղեկավար մարմինների աշխատանքներին։ Որպես համանախագահ՝ իր ծառայությունն է բերել Արևելյան Ուղղափառ Եկեղեցիների կոնֆերանսում։

Մոր Կիրիլը կարևոր դեր է խաղացել նաև նոր հիմնադրված «Քրիստոնեական Եկեղեցիները Միասին» էկումենիկ նոր մարմնի ստեղծման գործում։

2014 թ. մարտի 31-ին Ինատիոս Զակա II-ի մահից հետո Ասորի Ուղղափառ Եկեղեցու Սինոդը Մոր Կիրիլին ընտրել է Անտիոքի և Համայն Արևելքի Պատրիարք և Ասորի Ուղղափառ Եկեղեցու Պետ։

Գահակալության արարողությունը տեղի է ունեցել 2014 թ. մայիսի 29-ին։

Հարաբերություններ Հայ Առաքելական Սուրբ Եկեղեցու հետ[խմբագրել | խմբագրել կոդը]

Հայ և ասորի եկեղեցիները համագործակցում են՝

  • Եկեղեցիների Համաշխարհային Խորհրդում,
  • Մերձավոր Արևելքի Եկեղեցիների Խորհրդում,
  • Կաթոլիկ և Արևելյան Ուղղափառ Եկեղեցիների միջև ընթացող աստվածաբանական երկխոսության շրջանակներում,
  • Անգլիկան և Արևելյան Ուղղափառ Եկեղեցիների միջև ընթացող աստվածաբանական երկխոսության շրջանակներում,

Ներկայիս պատրիարքը բարեկամական հարաբերություններ ունի Հայ եկեղեցու սպասավորների հետ։ Նա 2001 թ. որպես Ասորի Ուղղափառ եկեղեցու ներկայացուցիչ Քրիստոնեության ընդունման 1700-ամյակի միջոցառումների շրջանակներում եղել է Հայաստանում։ 2011 թ. ներկա է եղել Մայր Աթոռում տեղի ունեցած եպիսկոպոսական ձեռնադրությանը։ 28 Յունիս 2014 թ. այցելել է Մեծի Տանն Կիլիկիո Կաթողիկոսություն։ 2014 թ. հոկտեմբերի 10-ին Իգնատիուս Եփրեմ Երկրորդը Ամենայն Հայոց Կաթողիկոսի հրավերով եղբայրական եռօրյա այցով ժամանել է Հայաստան՝ ուղեկցությամբ Տրիպոլիի և Լեռնային Լիբանանի արքեպիսկոպոս, Ս. Սինոդի գլխավոր քարտուղար Մոր Թեոփիլոս Սալիբայի, Հոմսի արքեպիսկոպոս Մոր Սիլվանոս Բուտրոս ալ Նեհմեհի, պատրիարքական քարտուղար Մոր Տիմոթեոս Մաթթա ալ Խուրիի, Հայր Կարլոս Բաբիի և Հայր Ջոզեֆ Բալիի։ Այցի շրջանակներում Ամենայն Հայոց Կաթողիկոսը և Անտիոքի և Համայն Արևելքի Պատրիարքը Ծիծեռնակաբերդի հուշահամալիրում կատարել են հոգեհանգիստ հայ և ասորի նահատակների համար։

Աղբյուրներ[խմբագրել | խմբագրել կոդը]