Թզուկային պտղաբուծություն

Խնձորի ինտենսիվ այգի (Ուզբեկստան)

Թզուկային պտղաբուծություն, ցածրաբուն պտղատու ծառերի (առավելապես՝ տանձենու, խնձորենու) աճեցում։ Պտղաբուծության ինտենսիվացման եղանակներից է։ Լայնորեն տարածված է տաք և չոր կլիմայով երկրներում։

Կիրառություն

Ցածրաճ պտղատու ծառեր ստանում են հիմնականում սովորական սորտերը պատվաստելով ցածրաճ պատվաստակալի վրա։ Խնձորենու համար որպես պատվաստակալ օգտագործում են հիմնականում նրա տարատեսակները (դուսենները և պարադիզկան), տանձենու համար՝ սերկևիլենին։ Ցածրաճ պատվաստակալի վրա պատվաստված ծառերն ավելի վաղահաս են, քան բարձրաճ պատվաստակալներինը և տալիս են խոշոր, բարձր շաքարայնության պտուղներ։ Թզուկ ծառերի սաղարթի ոչ մեծ չափերը հեշտացնում են ծառերի խնամքը և բերքահավաքը։ Միաժամանակ արմատային համակարգի նվազ տարածվածության պատճառով բերրի հողերը պահանջկոտ են և ունեն մշտական ոռոգման կարիք։

Այս հոդվածի կամ նրա բաժնի որոշակի հատված վերցված է «Գյուղատնտեսական հանրագիտարանից», որի նյութերը թողարկված են՝ Քրիեյթիվ Քոմմոնս Նշում-Համանման տարածում 3.0 (Creative Commons BY-SA 3.0) թույլատրագրի ներքո։