Զարկերակներ

Վիքիպեդիայից՝ ազատ հանրագիտարանից

Զարկերակներ, արտերիաներ, արյան անոթներ, որոնք սրտից արյուն են տանում դեպի հյուսվածքներն ու օրգանները։ Զարկերակային համակարգն ընդգրկում է թոքային Զարկերակներ, աորտան և նրա ճյուղավորումները։ Զարկերակներով դեպի օրգաններն ու հյուսվածքներն է հոսում թթվածնով և սննդանյութերով հարուստ արյուն, բացառությամբ թոքային Զարկերակների, որոնք սրտից դեպի թոքերն են տանում ածխաթթվով հարուստ արյուն։ Միևնույն զարկերակի առանձին ճյուղերը կամ մի քանի Զարկերակների բազմաթիվ ճյուղեր իրար միանալով կազմում են անաստամոզներ (բերանակցումներ), որոնք, Զարկերակների գլխավոր ճյուղով, արյան հոսքի ընդհատման դեպքում, ապահովում են արյան կոլլատերալային շրջանառությունը։ Զարկերակների պատերը կազմված են 3 շերտից, արտաքին՝ շարակցական (ադվենտիցիա), միջին՝ հարթ մկանային և առաձգական, ներքին՝ Էնդոթելային հյուսվածքներից։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 3, էջ 669 CC-BY-SA-icon-80x15.png