Բելառուսի լեզուներ

Բելառուսի պաշտոնական լեզուները, համաձայն Բելառուսի Հանրապետության Սահմանադրության 17 հոդվածի, բելառուսերենը և ռուսերենն են։ Սահմանադրությունը երաշխավորում է բոլոր ազգային լեզուներով մշակութային ժառանգության պահպանումը՝ ներառյալ նրանց լեզուները (հոդված 15)։

Բելառուսերենի և ռուսերենի կիրառությունը երկրում հավասար չէ։ Պատմականորեն ԽՍՀՄ-ի գոյության ընթացքում ստեղծվել էր այնպիսի իրավիճակ, որ ռուսերենի կիրառումը նախընտրելի էր բելառուսերենից։ Ներկայումս ռուսերենը գերիշխում է բելառուսների կյանքի բոլոր ոլորտներում. ռուսերենով են գրեթե բոլոր պետական փաստաթղթերը, փաստաթղթերի շրջանառությունը ևս գրեթե բոլոր կազմակերպություններում իրականացվում է ռուսերենով, լրատվամիջոցների մեծամասնությունը ևս ռուսերենով է։

Բելառուսի քաղաքացու առօրյայում ևս գերիշխողը ռուսերենն է, որը մեծ ազդեցություն ունի նաև բելառուսերենի վրա։ Ռուսերենով են շփվում մայրաքաղաքում, բոլոր մարզկենտրոններում և երկրի խոշոր քաղաքներում։ Ավելի փոքր քաղաքներում տիրում է բելառուսերենի և ռուսերենի խառնուրդ, այսպես կոչված՝ «տրասյանկա»-ն։ Տրասյանկան բավականին հաճախ իրենց խոսքում կիրառում են նաև պաշտոնական դեմքերը։ Երկու լեզուների համաժամանակյա պաշտոնական օգտագործումը երբեմն բերում է իրավիճակի, երբ ասվածը կամ գրվածը չի համապատասխանում ոչ ռուսերենի կանոններին, ոչ էլ բելառուսերենի։

Առօրյա խոսակցական լեզուն, համապատասխան ազգության բնակչության տոկոսը^[1]
Ազգություն	Բնակչություն, հազար մարդ	բելառուսերեն	ռուսերեն
Ընդհանուր	9,504	23.4	70.2
Բելառուսներ	7,957	26.1	69.8
Ռուսներ	785	2.1	96.5
Լեհեր	295	40.9	50.9
Ուկրաինացիներ	159	6.1	88.4
Հրեաներ	13	2.0	95.9