Բացասական սենյակային ճնշում

Վիքիպեդիայից՝ ազատ հանրագիտարանից
Սենյակում եղած օդը ակտիվ մղվում է դուրս, որպեսզի ստեղծվի բացասական ճնշում և դրսի օդը պասիվ կերպով մուտք գործի սենյակ:
Բացասական ճնշումով մեկուսացման սենյակ վարակիչ հիվանդություններով պացիենտների համար:

Բացասական սենյակային ճնշում, մեկուսացման եղանակ, որը կիրառվում է հիվանդանոցներում և բժշկական հաստատություններում սենյակների միջև աղտոտված օդի տարածումը կանխարգելելու համար[1][2]։ Այն կազմված է «բացասական ճնշում» (շրջակա միջավայրի ճնշումից փոքր ճնշում) ստեղծող օդափոխիչ համակարգից, ինչը թույլ է տալիս օդի հոսք դեպի մեկուսացման սենյակ, սակայն արգելակում է օդի ելքը սենյակից, քանի որ օդային հոսանքները ուղղվում են բարձր ճնշման տարածքից դեպի ցածր ճնշման տարածք։ Այս մեխանիզմի շնորհիվ կանխվում է վարակված օդի ելքը մեկուսացման սենյակից։ Այս եղանակը կիրառվում է հետևյալ վարակիչ օդակաթիլային հիվանդություններով պացիենտների մեկուսացման ժամանակ՝ տուբերկուլյոզ, կարմրուկ, ջրծաղիկ, գրիպ, ծանր ընթացքով սուր շնչառական համախտանիշ (SARS-CoV), Մերձավոր Արևելքի շնչառական համախտանիշ (MERS-CoV) և կորոնավիրուսային հիվանդություն 2019 (COVID-19)[3][4]:

Մեխանիզմ[խմբագրել | խմբագրել կոդը]

Սենյակների համակարգի սխեմատիկ պատկեր, որտեղ օդը (կապույտ սլաք) տեղափոխվում է մեկ ուղղությամբ՝ միջանցքից դեպի բացասական ճնշումով սենյակ (կանաչ): Աղտոտված օդն անվտանգ կերպով հեռացվում է տարածքից օդափոխիչ համակարգի միջոցով:

Բացասական ճնշում ստեղծվում և պահպանվում է այնպիսի օդափոխիչ համակարգով, որը հեռացնում է ավելի մեծ քանակով օգտագործված/աղտոտված օդ, քան սենյակ մտնող օդի քանակն է։ Օդը, որպես կանոն, մուտք է գործում սենյակ դռան տակ եղած տարածությամբ (բարձրությունը՝ մոտ 1.3 սմ)։ Այս տարածությունից բացի՝ սենյակի մնացած մասը պետք է լինի հնարավորինս անթափանց օդի համար. օդը չպետք է մուտք գործի սենյակի ճեղքերով և անցքերով, օրինակ՝ պատուհանի, լույսի աղբյուրների կամ էլեկտրականության տարրերի շուրջ տեղակայված։ Օդի անցանկալի ներհոսքն այս կետերից կարող է խաթարել կամ վերացնել սենյակի բացասական ճնշումը[1]։

Աղտոտված օդը կարող է պարունակել քիմիական նյութեր, մանրէներ կամ ռադիոակտիվ իզոտոպներ, որոնց ելքը դեպի շրջակա միջավայր անթույլատրելի է (ինչը կանխարգելելը բացասական ճնշումով սենյակի հիմնական նպատակն է), ուստի դուրս բերվող օդի ելանցքը պետք է առնվազն տեղակայված լինի այնպես, որ այլ մարդիկ կամ բնակեցված տարածքները զերծ մնան այդ օդի ազդեցությունից։ Որպես կանոն, օդը դուրս է բերվում շինության տանիքից։ Որոշ դեպքերում, օրինակ՝ խիստ վարակիչ մանրէների առկայություն կենսաանվտանգության 4-րդ մակարդակի (BSL-4) սենյակներում, օդն առաջին հերթին պետք է անցնի մեխանիկական ֆիլտրով կամ ենթարկվի ՈՒՄ ճառագայթներով, քիմիական նյութերով վարակազերծման, ինչից հետո միայն դուրս բերվում շրջակա միջավայր։ Միջուկային կայանների դեպքում դինամիկ հսկվում է օդում ռադիոակտիվ իզոտոպների պարունակությունը, իսկ արտանետումից առաջ այն, որպես կանոն, ֆիլտրվում է, ինչից հետո դուրս բերվում արտանետման երկար խողովակով ավելի մեծ բարձրությունների վրա՝ բնակեցված տարածքներից առավել հեռու։

Ծխով փորձ[խմբագրել | խմբագրել կոդը]

Ծխով փորձը կիրառվում է սենյակում բացասական ճնշման առկայությունը ստուգելու նպատակով[5]։ Ծուխ պարունակող խողովակը մոտեցվում է բացասական ճնշմամբ սենյակի դռան ստորին հատվածին՝ դրանից մոտ 5 սմ հեռավորության վրա։ Խողովակը զուգահեռ պահելով դռանը՝ բաց ենք թողնում ծխի փոքր քանակություն։ Կարևոր է ծուխը դանդաղ բաց թողնելը, որպեսզի դրա արագությունը չգերազանցի օդի ներս մտնելու արագությունը։ Եթե սենյակում հաստատված է բացասական ճնշում, ապա ծուխը, դռան տակ եղած տարածությամբ անցնելով, կհայտնվի սենյակում։ Եթե սենյակում բացասական ճնշում չկա, ապա ծուխը կտարածվի սենյակից հեռու կամ կմնա նույն տեղում։

Տես նաև[խմբագրել | խմբագրել կոդը]

Ծանոթագրություններ[խմբագրել | խմբագրել կոդը]

  1. 1,0 1,1 Negative Room Pressure to Prevent Cross-Contamination Արխիվացված 2016-03-10 Wayback Machine, Clean Air Solutions, Camil Farr, Retrieved 2010-03-10.
  2. Isolation Rooms & Pressurization Control Արխիվացված 2010-03-04 Wayback Machine, Penn State Department of Architectural Engineering, © 2008 The Pennsylvania State University. Retrieved 2010-03-10.
  3. Negative Pressure Isolation Rooms & Tuberculosis (TB) Isolation Rooms Արխիվացված 2014-01-17 Wayback Machine, AirMont Inc. Retrieved 2010-03-10.
  4. P. N. Hoffman, a, M. J. Weinbrenb and S. A. Stuartc. A practical lesson in negative-pressure isolation ventilation.. Journal of Hospital Infection. Volume 57, Issue 4, August 2004, Pages 345-346.
  5. Title: Negative Pressure Isolation Rooms, Minnesota Department of Corrections, Issue date 2007-07-03. Retrieved 2010-03-12.