Անտառային տնտեսություն (անտառտնտեսություն), արտադրության բնագավառ, որն իրականացնում է անտառների կայուն կառավարումը՝ անտառապահպանությունը, անտառապաշտպանությունը, անտառվերականգնումը, անտառապատումը, անտառգույքագրումը, անտառի արդյունավետության բարձրացումը և արդյունավետ անտառօգտագործումը՝ պահպանելով անտառների կենսաբազմազանության ինքնավերականգնման կարողությունը և ապահովելով անտառների բնապահպանական, սոցիալական ու տնտեսական ներուժի արդյունավետ օգտագործումը ներկա և ապագա սերունդների համար։
Անտառային տնտեսությունները վարում են անտառշինական նախագծերով նախատեսված համալիր միջոցառումներով։ Անտառային տնտեսության գործառույթներից է նաև անտառային տարածքներում բնապահպանական պահանջների պահպանության հսկողության ապահովումը՝ անտառխախտումների արձանագրման, ապօրինի անտառային պաշարների առգրավման, խախտումների նկատմամբ տարբեր պատժամիջոցների (տուգանքներ, վնասի հատուցում, վարչական և քրեական պատասխանատվություն) կիրառման միջոցով։ Անտառային տնտեսությունների համակարգը ղեկավարում է «Հայանտառ» կազմակերպությունը, որի կազմում կա 24 անտառային տնտեսություն (2005)։ Անտառային տնտեսությունները համապատասխան մասնագիտացված ծառայությունների միջոցով հաստատած ծրագրերով իրականացնում են անտառտնտեսվարման աշխատանքներ։
Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 1, էջ 444)։
Այս հոդվածի կամ նրա բաժնի որոշակի հատվածի սկզբնական տարբերակը վերցված էՀայաստանի բնաշխարհ հանրագիտարանից, որի նյութերը թողարկված են Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։
