Ալեքսանդր Բուսիգին
Ալեքսանդր Բուսիգին | |
---|---|
Ծնվել է | 1900 |
Ծննդավայր | Դոնի Ռոստով, Դոնի զորքի մարզ, Ռուսական կայսրություն |
Վախճանվել է | 1941 |
Վախճանի վայր | Սմոլենսկի մարզ, ՌԽՖՍՀ, ԽՍՀՄ |
Մասնագիտություն | գրող |
Լեզու | ռուսերեն |
Քաղաքացիություն | Ռուսական կայսրություն և ԽՍՀՄ |
Անդամակցություն | ԽՍՀՄ Գրողների միություն |
Ալեքսանդր Իվանովիչ Բուսիգին (ռուս.՝ Александр Иванович Бусыгин, 1900, Դոնի Ռոստով, Դոնի զորքի մարզ, Ռուսական կայսրություն - 1941, Սմոլենսկի մարզ, ՌԽՖՍՀ, ԽՍՀՄ), խորհրդային ռուս արձակագիր, ակնարկագիր, «На подъёме» հյուսիսկովկասյան ամսագրի գլխավոր խմբագիր, Ռուսաստանի քաղաքացիական և Երկրորդ համաշխարհային պատերազմների մասնակից։
Կենսագրություն
[խմբագրել | խմբագրել կոդը]Ալեքսանդր Բուսիգինը ծնվել է 1900 թվականին Դոնի Ռոստովում՝ աշխատավորի ընտանիքում։ 1915-1924 թվականներին աշխատել է Վլադիկավկազի երկաթուղային ճանապարհների արհեստանոցներում։ Ռուսաստանի քաղաքացիական պատերազմի ժամանակ եղել է զրահագնացքի զինվոր։ Պատերազմի ավարտից հետո վերադարձել է արհեստանոցներ։ Հետագայում զբաղվել է լրագրությամբ և գրական աշխատանքով, նախ եղել է աշխատանքային թղթակից, ապա՝ «Սովետսկի Յուգ» թերթի խմբագրության գրական աշխատակից։ Բուսիգինը իր առաջին ակնարկներն ու կարճ պատմությունները հրատարակել է 1923 թվականին։
Բուսիգինը եղել է Դոնի Ռոստովում և Հյուսիսային Կովկասում Պրոլետարական գրողների հյուսիսկովկասյան ասոցիացիայի կազմակերպիչներից մեկը (СКАПП), որի շրջանակներում համագործակցել է Վլադիմիր Կիրշոնի, Միխայիլ Շոլոխովի, Ալեքսանդր Ֆադեևի, Վլադիմիր Ստավսկու հետ։ 1924-1926 թվականներին լույս են տեսել Բուսիգինի «Երկուսը», «Վրեժ լուծեց», «Կրեմնյովկա ավան» պատմվածքները։ 1920-ական թվականների կեսերից եղել է «На подъёме» հյուսիսկովկասյան ամսագրի գլխավոր խմբագիրը։ Եղել է Միխայել Շոլոխովի մտերիմ ընկերը։
Բուսիգինը եղել է 1934 թվականի օգոստոսին կայացած Խորհրդային գրողների համամիութենական համագումարի պատվիրակ։
1928 թվականին «Մոսկվայի աշխատավոր» հրատարակչությունը հրատարակել է «Պողպատը թրծվել է» գիրքը։ Երկրորդ համաշխարհային պատերազմի Արևելյան ռազմաճակատի («Հայրենական մեծ պատերազմ», 1941-1945) գործողություններից առաջ Բուսիգինն աշխատել է «Բեսերգենևների ընտանիքը» վեպի վրա, սակայն չի ավարտել այն։ Գրականագետների խմբի և բանակային թերթի խմբագրության կազմի հետ մեկնել է Արևմտյան ռազմաճակատ, եղել «К победе» ռազմական թերթի թղթակից, մարտնչել է Սմոլենսկի անտառներում։ 1941 թվականի հոկտեմբերին ճակատամարտում լրջորեն վնասվել են նրա երկու ոտքերը, սակայն իր մեջ ուժ է գտել սողալով հասնել մինչև գնդացիրը, որի հաշվարկը ոչնչացրել էր հակառակորդի ականը և, փակելով ընկերների նահանջը, մինչև վերջին փամփուշտը կրակել է միայնակ[1]։
Հիշատակ
[խմբագրել | խմբագրել կոդը]Ռոստովի լոկոմոտիվների վերականգնման գործարանի մուտքի մոտ տեղադրվել է հուշատախտակ[2].
1915-1924 թվականներին այստեղ է աշխատել գրող Ալեքսանդր Բուսիգինը, որը հերոսաբար զոհվել է 1941 թվականի հոկտեմբերին հայրենիքի համար մղվող մարտերում։ |
Ծանոթագրություններ
[խմբագրել | խմբագրել կոդը]- ↑ House, Kommersant Publishing (1968 թ․ փետրվարի 17). Ogoniok (ռուսերեն). Kommersant Publishing House.(չաշխատող հղում)
- ↑ «Мемориал. Бусыгин Александр 1900-1941 (Екатерина Кольцова-Царёва) / Проза.ру». www.proza.ru. Վերցված է 2017 թ․ սեպտեմբերի 26-ին.
- 1900 ծնունդներ
- Դոնի Ռոստով քաղաքում ծնվածներ
- 1941 մահեր
- ԽՍՀՄ գրողների միության անդամներ
- Անձինք այբբենական կարգով
- Գրողներ այբբենական կարգով
- Խորհրդային գրողներ
- Խորհրդային խմբագիրներ
- Կարմիր դրոշի շքանշանի ասպետներ
- Հայրենական մեծ պատերազմի մասնակիցներ
- Ռուս արձակագիրներ
- Ռուս գրողներ
- Ռուսաստանի քաղաքացիական պատերազմի մասնակիցներ