1997 թվականին նա առաջադրվել է Էմմի-ի դրամատիկական սերիալի լավագույն սցենարի համար՝ «Գաղտնի նյութեր»[2], «Հիշիր մահվան մասին» էպիզոդի վրա իր աշխատանքի համար։ Անվանակարգը կիսել է սցենարիստներ Քրիս Քարթերի, Ֆրենկ Սպոտնիցի և Վինս Գիլիգանի հետ։ 1998 թվականին Շիբանը Էմմի մրցանակի անվանակարգը կիսել է «Գաղտնի նյութեր» հեռուստասերիալի պրոդյուսերական թիմի հետ՝ որպես լավագույն դրամատիկ սերիալ[3]։ 2009 թվականին Շիբանը վերամիավորվեց Գիլիգանի հետ՝ Գիլիգանի «Ամբողջ ծանրությամբ» սերիալի երկրորդ սեզոնի սցենարիստ/պրոդյուսեր աշխատելու համար։ 2010 թվականին Շիբանը ներկայացվել է ԱՄՆ սցենարիստների գիլդիայի մրցանակին «Ֆենիքս»[4] դրվագային դրամայի համար։ Շիբանը և սցենարիստների կազմը նաև կիսել են WGA մրցանակի լավագույն դրամատիկ սերիալ անվանակարգը երկրորդ սեզոնի վրա կատարված աշխատանքի համար[4]։ Երրորդ սեզոնում Շիբանը վերադարձել է «Ամբողջ ծանրությամբ»-ի թիմին որպես խորհրդատու պրոդյուսեր և հեռացել երրորդ սեզոնի վերջում։ 2010 թվականի օգոստոսին Շիբանը հաստատվել է որպես «Տորչվուդ», «Տորչվուդ։ հրաշքի օր» սերիալի չորրորդ սեզոնի սցենարիստ։ 2011 թվականին, Շիբանը միացել է հեռուստատեսային «Դժոխք անիվների վրա» սերիալին, որպես գործադիր պրոդյուսեր և սցենարիստ։ Սակայն 2012 թվականի նոյեմբերին շոուի ստեղծողները՝ Ջո և Թոնի Գեյթոնները, որոշել են այլևս չմասնակցել ամենօրյա արտադրությանը։ Շիբանին համարում էին լավ թեկնածու նրանց փոխարինելու համար, սակայն նա հայտարարեց, որ նույնպես լքում է սերիալը։