Կարո Լուկաս
Կարո Լուկասը (բուն անունով՝ Կարօ Ղուկասեան) (1949 Սեպտեմբերի 4 - 2010 Հուլիսի 8) պարսկահայ գիտահետազոտող և ճարտարագետ: Նա հայտնի է որպես «Իրանի ռոբոտատեխնիկայի հայր»:
Բովանդակություն |
[խմբագրել] Կենսագրություն
Կարո Լուկասը ծնվել է 1949 թվականին Սպահանում: Ավարտել է Թեհրանի «Քուշեշ-Դավթյան» միջնակարգ դպրոցը: Ուսումը շարունակել է Թեհրանի Պետական համալսարանի Տեխնիկական գիտությունների ֆակուլտետի էլեկտրական ճարտագիտության ճյուղում 1973 թվականին, ավարտելով մագիստրատուրան: Ապա ուսման շարունակման համար մեկնել է ԱՄՆ-ի Բերքլի համալսարան, 1976 թվականին էլեկտրական և համակարգչային գիտությունների բաժնից ստանալով ասպիրանտուրա՝ համակարգերի հսկողություն թեքումով: Ապա վերադարձել է Իրան, որտեղ 30 տարի դասավանդել և գիտահետազոտական աշխատանքներ է ղեկավարել Թեհրանի Պետական համալսարանի իր ուսանած Տեխնիկական գիտությունների ֆակուլտետում: 2006 թվականին Իրանի ճարտարագիտության ասպարեզում ճանաչվել է որպես «Մնայուն դեմք»:[1]
Նա ամուսնացել է Էմիլիա Ներսիսյանցի հետ, որի արդյունքում ունի մեկ զավակ Արման անունով:
[խմբագրել] Աշխատանք
1986-ից 1988 թվականներին ղեկավարել է Թեհրանի Պետական համալսարանի Տեխնիկական գիտությունների ֆակուլտետի էլեկտրականության բաժինը, որի ընթացքում նաև հիմնադրել է համալսարանի Ուշիմ համակարգերի հսկողության կենտրոնը: 1993-ից 1997 թվականներին տնօրինել է Իրանի Հիմնարար գիտությունների կենտրոնի (IPM) աշխատանքները:[1]
Լուկասը Իտալիայի Թրիեստեի Տեսական ֆիզիկայի միջազգային կենտրոնի (International Center for Theoretical Physics) և Ծագումնաբանական ճարտարագիտության և կենսատեխնոլոգիայի միջազգային կենտրոնի (International Center for Genetic Engineering and Biotechnology) գիտահետազոտ, Կիրառական մաթեմատիկայի ինստիտուտի անդամ, Չինական գիտությունների ակադեմիայի անդամ, Հարբինի էլեկտրական տեխնոլոգիայի ինստիտուտի (Harbin Institute of Electrical Technology) գիտահետազոտ, Օնտարիոյի հետազոտական և արտադրական ընկերության գիտահետազոտական գործակից (research associate), և Բերքլի համալսարանի Էլեկտրական հետազոտությունների լաբորատորիայի (Electronic Research Laboratory) գիտահետազոտական գործակից է եղել:[2][3]
Լուկասի գիտական հետաքրքրությունների շարքում էր կենսաբանական հաշվարկումը, հաշվողական բանականությունը, անորոշ համակարգերը, բանական վերահսկումը (intelligent control), նեյրոնային ցանցերը (neural networks), բազմագործակալ համակարգերը (Multiagent Systems), տվյալների ականումը (Data Mining), ֆինանսական մոդելավորումը, և գիտելիքների կառավարումը:[2][3]
Կարո Լուկասը հրատարակել է ավելի քան 1200 գիտահետազոտական հոդված, միջազգային գիտաժողովներում ավելի քան 200 դասախոսություն ներկայացրել, 20 միջազգային գիտական պարբերականների խմբագրական կազմում է եղել, 8 գիրք է հեղինակել, և 39 գիտական խմբագրված հավաքածոների համահեղինակն է:[1]
[խմբագրել] Աղբյուրներ
- ↑ 1,0 1,1 1,2 Րաֆֆի օրացոյց, Թեհրան, Իրան, 2011
- ↑ 2,0 2,1 Իրանի արհեստական բանականության հայրը մահացավ (պարսկերեն)
- ↑ 3,0 3,1 Իրանի Պետական համալսարանում տեղի ունեցավ Պրոֆ. Լուկասի հուշ երեկոն (պարսկերեն)
