Աստղաչափություն

Վիքիպեդիայից՝ ազատ հանրագիտարանից

Աստղաչափություն (Աստրոմետրիա), աստղագիտության բաժին. հիմնականում զբաղվում է լուսատուների կոորդինատների որոշման մեթոդների մշակմամբ, նրանց գործնական կիրառման հարցերով։

Աստղաչափության հիմնական ենթաբաժիններից մեկն է ոլորտային աստղագիտությունը, որը մշակում է կոորդինատների որոշման մաթեմատիկական մեթոդները։ Միջօրեականում կատարվող դիտումներով լուսատուների կոորդինատների գործնական որոշումը ֆունդամենտալ աստղագիտության խնդիրն է։ Լուսատուի ուղղակի ծագումը որոշելու համար գրանցվում է միջօրեականով նրա անցնելու պահը։ Հակումը որոշվում է միջօրեականում լուսատուի զենիթային հեռավորության չափմամբ։ Չափումների արդյունքները շտկվում են` հաշվի առնելով լույսի բեկունակության, աբեռացիայի, պրեցեսիայի և նուտացիայի ազդեցությունները, ինչպես նաև գործիքային սխալները։ Աստղերի կոորդինատները հրատարակվում են որպես ֆունդամենտալ աստղացուցակներ։

Աստղաչափության խնդիրներից են նաև ժամանակի ծառայությունը, լայնության ծառայությունը (ուսումնասիրում է աշխարհագրական լայնության` բևեռների շարժումով պայմանանվորվող փոփոխությունները), գործնական աստղագիտությունը։[1]

Ծանոթագրություններ[խմբագրել]

  1. Մ. Առաքելյան։ ՀՍՀ, հատոր 1, Ե., 1974, էջ 583։