Աբել Ապրեսյան
- Վիքիպեդիայում կան հոդվածներ Ապրեսյան ազգանունով այլ մարդկանց մասին։
Աբել Ապրեսյան | |
|---|---|
| Ծնվել է | 1860 |
| Ծննդավայր | Շուշի[1] կամ Պարսկաստան[2] |
| Վախճանվել է | 1930-ական թթ. |
| Վախճանի վայր | Աստրախան (?)[1] |
| Մասնագիտություն | լրագրող, հրապարակախոս, հրատարակիչ |
| Լեզու | հայերեն |
| Ազգություն | հայ |
| Աբել Ապրեսյան Վիքիդարանում | |
Աբել Դավիթի Ապրեսյան (1860, Շուշի կամ Պարսկաստան - 1930-ական թթ., Աստրախան ?), հայ լրագրող, հրապարակախոս, հրատարակիչ։
Կրթությունն ստացել է Թավրիզի հայոց դպրոցում 1870-ական թվականների կեսերին՝ աշակերտելով վիպասան Րաֆֆուն։ Դպրոցն ավարտելուց հետո եկել է Կովկաս, որպես առևտրական գործակալ աշխատել է Շուշիում։ Այդ թվականներից սկսել է աշխատակցել «Մշակ» պարբերականին։ 1881 թվականին Շուշիում տպագրել է Րաֆֆու «Խենթը» վեպը։ Երկար տարիներ աշխատակցել է արևելահայ մամուլին, իսկ 1890-ական թվականների սկզբներից թղթակցություններ է ուղարկել Արփիար Արփիարյանի «Հայրենիք» թերթին (Կ. Պոլիս)։ 1910-1912 թվականներին Աստրախանում հրատարակել է «Մեր կյանքը» պարբերականը[2]։
Օգտագործել է Ա., Ա. Ա., Ա. Դ. Ա., Ա. Աբ., Ա. Ապ., Աբ. Ապ., Թղթակից, Բ. Մեռնեսյան, А. Апр. ծածկանունները[1]։