Ստեփան Ալիխանյան

Ստեփան Ալիխանյան
Ծնվել է	1910
Ծննդավայր	Թիֆլիս, Ռուսական կայսրություն
Մահացել է	մարտի 26, 1972(1972-03-26)
Մահվան վայր	Լենինական, Հայկական ԽՍՀ, ԽՍՀՄ
Մասնագիտություն	դերասան և կինոռեժիսոր
Քաղաքացիություն	Հայաստան
Կրթություն	Թիֆլիսի հայպետթատրոնին կից դրամատիկական ստուդիա
Թատրոն	Թիֆլիսի պետական թատրոն, Թիֆլիսի Պատանի հանդիսատեսի թատրոն, Լենինականի տիկնիկային թատրոն
Դերեր	Սենեկապետ, Միստր Սմիտ, Մանուկ աղա, Պրեզիդենտ, Մարգարյան
Ներկայացումներ	«Քաջ Նազար», «Մեծապատիվ մուրացկաններ», «Սեր և խարդավանք», «Սպանված աղավնի», «Քանդած օջախ», «Կամո», «Ռևիզոր»

Ստեփան Ալիխանյան (1910, Թիֆլիս, Ռուսական կայսրություն - մարտի 26, 1972(1972-03-26), Լենինական, Հայկական ԽՍՀ, ԽՍՀՄ), դերասան, ռեժիսոր, ՀՀ վաստակավոր արտիստ։

Կենսագրություն

1917 թվականին ընդունվել է Թիֆլիսի 89-րդ դպրոց։ Ավարտել է նաև բանվորական միջնակարգ դպրոցը։ 1922 թվականին Թիֆլիսի պետական թատրոնում առաջին անգամ բեմ է բարձրացել և «Ջրասույզ զանգ» ներկայացման մեջ կատարել փոքրիկ տղայի դեր։ 1932 թվականին Ալիխանյանն ավարտելով Թիֆլիսի հայպետթատրոնին կից դրամատիկական ստուդիան` սկսել է աշխատել թատրոնում։

Շարունակելով աշխատանքը թատրոնում` Ստեփան Ալիխանյանը 1933-1941 թվականներին աշխատել է Թիֆլիսի Պատանի հանդիսատեսի հայկական թատրոնում և կատարել մի շարք բնութագրական դերեր։

Մահացել է 1972 թվականի մարտի 26-ին, Լենինականում։

Ստեղծագործական կյանք

Դրամատիկական դերերի դերասան

Ալիխանյանը որպես դերասան հանդես է եկել մի քանի թատրոններում։ 1933-41 թվականներին Թիֆլիսի Պատանի հանդիսատեսի հայկական թատրոնում մարմնավորած հայտնի դերերից են.

• «Քաջ Նազար»` Սենեկապետ
• «Սկաուտ-89»` Միստր Սմիտ
• «Մեծապատիվ մուրացկաններ»` Մանուկ աղա
• «Սեր և խարդավանք»` Պրեզիդենտ
• «Սպանված աղավնի»` Մարգարյան

Երբ ավարտվել է Հայրենական մեծ պատերազմը, Ստեփան Ալիխանյանին հրավիրել են Լենինականի պետթատրոն։ Այստեղ մեծ մասամբ մարմնավորել է բացասական կերպարներ` խաղալով «Կրեչինսկու հարսանիքը» (Նելկին), «Քանդած օջախ» (Մարմարով), «Թշնամիներ» (Սկորոբոգատով), «Կամո» (Նահանգապետ), «Ռևիզոր» (Քաղաքագլուխ) և այլ ներկայացումներում։

Տիկնիկային արվեստ

Ալիխանյանը շատ մեծ սեր ուներ դեպի տիկնիկային թատրոնի արվեստը։ Այդ պատճառով 1947 թվականին նա վերականգնել է իր գործունեությունը ավելի վաղ դադարեցրած Լենինականի տիկնիկային թատրոնը։ Վերապատրաստում է անցել Մոսկվայում` տիկնիկային թատրոնի արվեստում առավել հմուտ դառնալու համար։ Մանուկների համար բեմադրել է մի շարք ներկայացումներ, որոնցից են «Չախ-չախ թագավորը», «Գառնիկ ախպերը», «Տերն ու ծառան», «Գիքորը», «Ոսկի ձկնիկը», «Ռուսլան և Լյուդմիլան», «Կարմիր գլխարկը», «Խոջա Նասրեդդինը», «Ալադինի կախարդական լամպը»։ Բացի հայտնի գործերից, Ալիխանյանը բեմադրել է նաև իր գրած պիեսները, որոնցից են, օրինակ, «Բերանբաց կինը», «Ոսկե խնձորը» և այլն։

Հիշատակ

• Ստեփան Ալիխանյանի անունն է կրում Գյումրու տիկնիկային թատրոնը։