Հակոբ Արսենյան

Անվան այլ կիրառումների համար տե՛ս՝ Հակոբ Արսենյան (այլ կիրառումներ)

Վիքիպեդիայում կան հոդվածներ Արսենյան ազգանունով այլ մարդկանց մասին։

Հակոբ Արսենյան
Ծնվել է	1881
Ծննդավայր	Բրուսայի նահանգ Նիկոմիդիայի գավառակ Օվաջըկ գյուղ
Մահացել է	անհայտ
Կրթություն	Կ. Պոլսի Օսմանյան կայսերական բժշկական համալսարանի դեղագործական բաժին
Մասնագիտություն	բժիշկ
Աշխատավայր	Գազայի անգլիական C.M.S. հիվանդանոցի դեղատուն

Հակոբ Արսենյան (1881, Բրուսայի նահանգ, Նիկոմեդիայի գավառակ, Օվաջըկ գյուղ - անհայտ), հայ բժիշկ։

Կենսագրություն

Հակոբ Արսենյանը ծնվել է 1881 թվականին, Բրուսայի նահանգի Նիկոմեդիայի գավառակի Օվաջըկ գյուղում։ Նախնական ուսումն ստացել է ծննդավայրի ազգային վարժարանում։ 1904-1907 թվականներին ուսանել է Կ. Պոլսի Օսմանյան կայսերական բժշկական համալսարանի դեղագործական բաժնում։ Սեփական դեղատուն է ունեցել Բրուսայի նահանգի Ադաբազար, ապա՝ Զմյուռնիա նահանգի կենտրոն Զմյուռնիա քաղաքներում։ 1915 թվականին Մեծ եղեռնի ժամանակ, մահացու վտանգներից ազատվելուց հետո, ընտանիքով փորձել է Մեսքենեից Հալեպ փախչել։ Հազար ու մի դժվարություններ կրելուց հետո օսմանյան բանակ է զորակոչվել։ Որպես զինվորական դեղագործ, հիսնապետի աստիճանով ուղարկվել է Երուսաղեմ, ուր տեղափոխել է ընտանիքի ողջ մնացած անդամներին։ 1918 թվականին օսմանյան կառավարությունը նրան նշանակել է Բեթղեհեմ քաղաքի դեղագործ։ 1918 թվականին բրիտանական բանակը Պաղեստինը գրավելիս, Թուլ-Քերիմում գերի է ընկել։ Տարագրվել է Եգիպտոս և վեց ամիս բանտարկված մնացել։ Ազատվելուց հետո վերադարձել է Երուսաղեմ` ընտանիքի մոտ։ 1920 թվականին բրիտանական մանդատային կառավարությունը նրան նշանակել է Գազա քաղաքի դեղագործ։ 1923 թվականին աշխատանքի է անցել Գազայի անգլիական C.M.S. հիվանդանոցի դեղատանը։ Եղել է բազմազգ քաղաքում հարգված ու սիրված մարդ և հմուտ մասնագետ։ 1938 թվականի հասցեն` Agop Arsenian, Kaza (Palestine)։

Գրականություն

• Հ. Մկրտիչ Վարդ. Պոտուրեան, Հայ Հանրագիտակ, Պուքրէշ 1938, Բ հատոր, էջ 301-302։

Աղբյուրներ

• Հարություն Մինասյան, Օսմանյան կայսրությունում և Թուրքիայի Հանրապետությունում բռնաճնշումների և ցեղասպանության ենթարկված հայ բժիշկներ, Երևան, «Լուսաբաց», 2014 — 520 էջ։