OTE-ի աշտարակ

OTE-ի աշտարակ
Տեսակ	հեռուստաաշտարակ
Երկիր	Հունաստան
Վարչատարածք	Սալոնիկի մունիցիպալիտետ
Ձևավորում	օգոստոսի 7, 1966

OTE-ի աշտարակ, (հունարեն՝ Πύργος του ΟΤΕ), 76 մետր բարձրությամբ աշտարակ հունական Սալոնիկ քաղաքի միջազգային տոնավաճառային կենտրոնում։ Բացումը տեղի է ունեցել 1966 թվականին։ 2005 թվականին աշտարակը նորացվել է։

Կառույցի նախագծերը պատրաստել է հույն ճարտարապետ Ա. Անաստիադիսը։ 1965-ին աշտարակն արդեն կանգուն էր, և հաջորդ տարում այդտեղից է կատարվել հունական հեռուստատեսության առաջին սև-սպիտակ հաղորդման հեռարձակումը^[1]։ 1970-ական թվականներին աշտարակն օգտագործվել է նաև փորձարարական VHF անալոգային շարժական հեռախոսացանցի ալեհավաքների աջակցման նպատակով։ Ներկայումս օգտագործվում է Cosmote բջջային շարժական հեռախոսացանցի կողմից։ Քաղաքի ժամանակակից ճարտարապետության հուշարձաններից մեկը դարձած աշտարակը արդյունավետորեն օգտագործվում է նաև Սալոնիկի միջազգային տոնավաճառի գործելու ողջ ընթացքում։ Իսկ վերին հարկում տեղավորված պտտվող ռեստորանն ու բար-սրճարանը գործում են կլոր տարին։

Պատմություն[խմբագրել | խմբագրել կոդը]

Ճարտարապետ Ալեքսանդրոս Անաստասիադիսի նախագծած OTE-ի աշտարակը քառահարկ է, ունի 76 մետր բարձրություն և շահագործման է հանձնվել 1966 թվականին։ Սկզբնական շրջանում օգտագործվել է Հունաստանի պետական հեռուստատեսության հաղորդումները հեռարձակելու նպատակով։ Ժամանակի ընթացքում վեևրափոխումների ենթարկվելով՝ ներկայումս կառույցը վերածվել է ամբողջովին նորացված հեռահաղորդակցային կենտրոնի։ Բացի այդ, Հունաստանի մշակութային մայրաքաղաքի համբավ վայելող, ճարտարապետական հրաշալիքներով հարուստ Սալոնիկ քաղաքի տեսարժան վայրերից մեկն է դարձել^[2]։ Աշտարակի սեփականատերը TEF-Helexpo ընկերությունն է, որը OTE-ին վարձակալության է հանձնել կառույցը^[3]։

Վերին՝ չորրորդ հարկում տեղակայված պտտվող ռեստորանն ու բար-սրճարանը առանցքի շուրջ մեկ լրիվ պտույտ կատարում են 45 րոպեում։ Չորրորդ հարկ կարելի է հասնել ինչպես վերելակով, այնպես էլ ոտքով՝ բարձրանալով 166 աստիճան^[4]։

Կառույցի բարձրությունը առանց ալեհավաքի հենարանի մոտավորապես 45 մետր է^[3]։