Կանչ (թերթ, Բեյրութ)

Անվան այլ կիրառումների համար տե՛ս՝ Կանչ (այլ կիրառումներ)

Կանչ
Տեսակ	թերթ
Լեզու	արևմտահայերեն, արաբերեն
Հիմնադրվել է	1971
Հրատարակիչ	Հ. Մատեյան
Երկիր	Լիբանան
Գրասենյակ	Բեյրութ, Լիբանան
OCLC	61385969

«Կանչ», քաղաքական, հասարակական և գրական շաբաթաթերթ։ Լույս է տեսել 1971 թվականից, Բեյրութում։ Հրատարակության պատասխանատուն էր Հ. Մատեյանը։

Լիբանանի կոմունիստական կուսակցության քաղաքականության արտահայտիչն էր։ Լուսաբանում էր Լիբանանի և միջազգային կոմունիստական շարժումը, ԽՄԿԿ և Հայաստանի կոմունիստական կուսակցության գործունեությունը, արծարծում արաբ ժողովրդի սոցիալական և տնտեսական, ազգային-ազատագրական պայքարի հարցեր։

Լայն տեղ է հատկացրել Խորհրդային Հայաստանում տեղի ունեցող իրադարձություններին, պրոպագանդում հայրենիքի մշակութային և տնտեսական վերելքը։ Աշխատելով սփյուռքահայությանը համախմբել հայրենիքի շուրջը, նրան մտահոգող հարցերի լուծումը «Կանչ» թերթի գլխագիրը կապում էր հայրենիքի պետականության հետ։

Ջատագովել է հայ և արաբ ժողովուրդների բարեկամությունը։ Օգտվել է ՏԱՍՍ-ի և Արմենպրեսի հաղորդագրություններից, արտատպել խորհրդահայ գրողների ստեղծագործություններ և մշակույթի գործիչների հոդվածներ։ Տպագրել է գրական էջեր, արվեստի հարցերին նվիրված նյութեր, մարզական լուրեր։

Հանդիսացել է Լիբանանի կոմունիստական կուսակցության «Ալ-Նիդա» արաբերեն օրաթերթի հավելվածը։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 5, էջ 141)։