Երևանի Վ. Բրյուսովի անվան պետական լեզվահասարակագիտական համալսարանի գրադարան
 | |
| Երկիր |  Հայաստան |
|---|---|
| Տեսակ | գրադարան |
| Հիմնվել է | 1935 |
| Տեղադրություն | Երևան |
| Հասցե | Թումանյան փողոց, 42 |
| Հավաքածուներ | |
| Չափ | 200 000 |
| Այլ տվյալներ | |
| Տնօրեն | Աննա Չուլյան |
| Կայք | brusov.am/library/yslu-library/about-library |
Երևանի Վ. Բրյուսովի անվան պետական լեզվահասարակագիտական համալսարանի գրադարան, համալսարանական գրադարան, որը հիմնադրվել է 1935 թվականին։ Գտնվում է Երևան քաղաքում, Թումանյան 42 հասցեում։
Պատմություն[խմբագրել | խմբագրել կոդը]
ԵՊԼՀ գրադարանը հիմնադրվել է 1935 թվականին։ Երևանի Վ. Բրյուսովի անվան պետական լեզվահասարակագիտական համալսարանի պատմությունը սկիզբ է առել 1935 թվականի փետրվարի 4-ին։ Գործել է որպես երկամյա մանկավարժական ինստիտուտ՝ ռուսաց լեզվի ուսուցիչներ պատրաստելու նպատակով։ Բուհը թե՛ համակարգային, թե՛ բովանդակային բազում փոփոխությունների է ենթարկվել, սակայն հավատարիմ մնացել իր կարևոր սկզբունքին՝ օտար լեզվի բարձրակարգ մասնագետների պատրաստմանը։ Պահպանելով ավանդույթները՝ գրադարանը որդեգրել է հետազոտական գործունեությանը, դասավանդման և կրթության զարգացմանը նպաստելու սկզբունքը։ Գրադարանի հիմնական առաքելությունն է կազմակերպել ԵՊԼՀ ընթերցողական համակազմի համալսարանական պահանջներին և գրադարանավարության արդի չափանիշներին համապատասխան սպասարկում[1]։
Գործունեություն և գրքային ֆոնդ[խմբագրել | խմբագրել կոդը]
Գրադարանը ԵՊԼՀ-ի ակտիվ ստորաբաժանումներից մեկն է համարվում։ ԵՊԼՀ գրադարանում գործում են հետևյալ բաժինները՝ համալրման և մշակման, սպասարկման և գրապահոց, էլեկտրոնային սպասարկման և տեղեկատվության, ընթերցասրահ, Ավստրիական գրադարան։ Այսօր կարևորագույն դեր ունի գրադարանի ավտոմատացումը։ Անընդմեջ ընդլայնվում են գրադարանային ծառայությունների շրջանակները՝ տեխնոլոգիաների և տեղեկատվության ժամանակակից ձևերի ու մեթոդների ներդրմամբ։
Գրադարանից կարող են օգտվել համալսարանի ողջ աշխատակազմը և ուսումնառողները։ Յուրաքանչյուր այլ բուհի ուսանող կամ դասախոս կարող է այցելել ԵՊԼՀ գրադարան որպես արտաքին ընթերցող և օգտվել գրադարանի ֆոնդերից միայն գրադարանի տարածքում։
Գրադարանային ֆոնդերը ձևավորվում և նպատակաուղղված համալրվում են ԵՊԼՀ-ում գործող կրթական ծրագրերին և գիտահետազոտական ուղղություններին համապատասխան։ Հիմնականում ֆոնդերը զետեղված են տարբեր հավաքածուներում, դասակարգված են հատուկ բաժիններով և հասանելի են էլեկտրոնային գրացուցակի միջոցով։
Հիմնադրման օրվանից ի վեր գրադարանը համալրվել է օտարալեզու գրականությամբ։ Այսօր գրքային ֆոնդի մոտ 200000 կտոր գրքից միայն 30%-ն է հայերեն։ Օտարալեզու ֆոնդերը հիմնականում համալրվում են դեսպանատների և հյուպատոսարանների միջոցով՝ ԱՄՆ-ի, Ֆրանսիայի, Գերմանիայի, Ավստրիայի, Շվեյցարիայի, Իտալիայի, Հոլանդիայի, Ռուսաստանի, Վրաստանի, Չինաստանի, Հարավային Կորեայի, Պարսկաստանի, Հնդկաստանի և այլն։ Գրադարանը ակտիվ համագործակցում է նաև ՄԱԿ-ի, Եվրախորհրդի և այլ միջազգային կազմակերպությունների գրասենյակների հետ։ Ընթերցասրահում է գտնվում ՄԱԿ-ի անկյունը, որը պարբերաբար համալրվում և թարմացվում է նոր գրականությամբ։
Համագործակցում է Հայաստանի բոլոր բուհական գրադարանների հետ տարբեր ձևաչափերով՝ գրքափոխանակումից սկսած մինչև նեղ մասնագիտական հարցեր։ Գրադարանում հաճախ են կազմակերպվում գրադարանային ոլորտին առնչվող սեմինարներ, հանդիպումներ։
Գրադարանն իրականացնում է միջգրադարանային բաժնույթ ոչ միայն Ազգային և ՀՀ ԳԱԱ հիմնարար գրադարանների հետ, այլև գրքափոխանակություն ԱՄՆ Կոնգրեսի գրադարանի հետ՝ Հայաստանում ԱՄՆ դեսպանատան Տեղեկատվական ռեսուրսների կենտրոնի օժանդակությամբ։ Արդեն մի քանի տարի է՝ գրադարանը համագործակցում է «Առաջին գրական գործակալության», «Անտարես», «Զանգակ», Ռուսաստանի «Совпадение», «Квадривиум» հրատարակչությունների հետ։ Կազմակերպվում են գրքերի շնորհանդեսներ, հանդիպումներ գրողների հետ, այդ թվում՝ արտասահմանյան։
Հասանելիություն[խմբագրել | խմբագրել կոդը]
- 2011 թվականից գործում են «Առցանց պատվեր» և «Հարց գրադարանավարին» ծառայությունները։ «Գրականության հայտ» ծառայությունը ի սկզբանե ստեղծվել է որպես օժանդակ միջոց առարկայական նկարագրերի կազմման համար և միտված է օգնելու դասախոսներին։
- 2015 թվականից ԵՊԼՀ գրադարանը իր պատմության ընթացքում առաջին անգամ ընդգրկված է որպես գործընկեր Էրազմուս+ բարձրագույն կրթության ոլորտում կարողությունների կառուցում (Erasmus+ Capacity Building in Higher Education) «Գրադարանային ցանցի աջակցման ծառայություններ. Հայաստանի, Մոլդովայի և Բելառուսի գրադարանների արդիականացում գրադարանի աշխատակազմի մասնագիտական զարգացման և գրադարանների բարեփոխման միջոցով» նախագծում[2]։
- 2016 թվականին ներդրվել է գրադարանային գործընթացների էլեկտրոնային կառավարման համակարգը՝ հիմնված բաց/ազատ կոդերի սկզբունքով նախագծված KOHA համակարգի վրա։ ԵՊԼՀ գրացուցակը Հայաստանի գրադարանների համահավաք քարտագրման համակարգից տեղափոխվեց KOHA-ի հիմքի վրա գործող նոր համակարգ[3]։
- Անդամակցում է Հայաստանի էլեկտրոնային գրադարանների կոնսորցիումին (ՀԷԳԿ), ինչի շնորհիվ գրադարանին հասանելի են միջազգային բարձր վարկանիշ ունեցող գիտական շտեմարանները, որոնց առկայությունը պարտադիր է գիտահետազոտական աշխատանքների համար[4]։
Ծանոթագրություններ[խմբագրել | խմբագրել կոդը]
- ↑ Չուլյան, Աննա. «Երեվանի պետական լեզվահասարակագիտական համալսարանի գրադարանը հնի և նորի խաչմերուկում. Բանբեր Հայաստանի գրադարանների, 3 (1), 2017» (PDF). Արխիվացված է օրիգինալից (PDF) 2018 թ․ մարտի 29-ին.
- ↑ Library Network Support Services: modernising libraries in Armenia, Moldova and Belarus through library staff development and reforming libraries
- ↑ ԵՊԼՀ գրադարանի էլեկտրոնային գրացուցակ
- ↑ «Հայաստանի էլեկտրոնային գրադարանների կոնսորցիում».