Երիտասարդության միջազգային օր

Վիքիպեդիայից՝ ազատ հանրագիտարանից
Jump to navigation Jump to search
Երիտասարդության միջազգային օր
Օր 12 օգոստոսի
Տևողությունը մեկ օր (24 ժամ)
Պարբերականությունը տարին մեկ անգամ, նույն օրը
Ընդունվել է 1999 թ., դեկտեմբերի 17

Երիտասարդության միջազգային օր (անգլ.՝ International Youth Day), երիտասարդությանն առնչվող հարցերի վերաբերյալ տեղեկացվածության բարձրացմանը միտված միջազգային օր։ ՄԱԿ-ի կողմից հաստատված ամենամյա այս տոնը առաջին անգամ նշվել է 2000 թվականի օգոստոսի 12-ին։

Նախապատմությունը[խմբագրել | խմբագրել կոդը]

1995 թվականի դեկտեմբերի 14-ին ՄԱԿ-ի Գլխավոր ասամբլեան, հաշվի առնելով հասարակության մեջ երիտասարդության կարևորագույն դերը, ընդունում է ոլորտային հիմնարար մի փաստաթուղթ (A/RES/50/81)՝ Երիտասարդությանն առնչվող գործողությունների համաշխարհային ծրագիրը (ԵԳՀԾ (WPAY))[1]։ 1998 թվականի օգոստոսի 8-12-ին Լիսաբոնում տեղի ունեցած երիտասարդության հարցերով նախարարների համաշխարհային խորհրդաժողովը նույնպես, կարևորելով երիտասարդության դերը, իր Երիտասարդական քաղաքականության ու ծրագրերի մասին հռչակագրում (WCMRY/1998/28)[2]՝ ի թիվս այլ մտքերի, առաջարկում է օգոստոսի 12-ը հռչակել երիտասարդության միջազգային օր։

Հռչակումը[խմբագրել | խմբագրել կոդը]

Իր աջակցությունը հայտնելով Լիսաբոնյան հռչակագրի առաջարկին և հիմք ընդունելով իր նախորդ որոշումները՝ ՄԱԿ-ի Գլխավոր ասամբլեան 1999 թվականի դեկտեմբերի 17-ին որոշում է կայացնում (A/RES/54/120, կետ 7-րդ)[3] օգոստոսի 12-ը հռչակել Երիտասարդության միջազգային օր։

Նպատակը[խմբագրել | խմբագրել կոդը]

ՄԱԿ-ի Գլխավոր ասամբլեան բոլոր շահագրգիռ կողմերին առաջարկում է Օրվա նշանավորման և Գործողությունների ծրագրի վերաբերյալ (հատկապես երիտասարդների շրջանում) իրազեկության բարձրացման նպատակով բոլոր մակարդակներում կազմակերպել տեղեկատվական-քարոզչական միջոցառումներ։
Ենթադրվում է, որ ամբողջ աշխարհում կառավարությունների, կազմակերպությունների համար երիտասարդության հիմնախնդիրների վրա ուշադրություն հրավիրելու հնարավորություն է ստեղծվում։

Անցկացման ձևը[խմբագրել | խմբագրել կոդը]

Ավանդաբար տոնի նախօրեին ուղերձով հանդես է գալիս ՄԱԿ-ի Գլխավոր քարտուղարը։
Տարբեր երկրներում շնորհավորական ուղերձներով հանդես են գալիս նաև կենտրոնական իշխանության և տեղական ինքնակառավարման մարմինների ղեկավարները, տարաբնույթ միջազգային և ազգային կազմակերպությունների ու կառույցների ներկայացուցիչները։
Տեղի են ունենում ոլորտի պատասխանատուների, երիտասարդական կազմակերպությունների հանդիպումներ, քննարկումներ, երիտասարդական ու մշակութային միջոցառումներ։

Միջազգային օրվա թեմաները[խմբագրել | խմբագրել կոդը]

Յուրաքանչյուր հերթական օրվա (տարվա) համար ընտրվում է որոշակի թեմատիկ ուղղություն, որի շրջանակում էլ փորձ է արվում համատեղել, կենտրոնացնել շահագրգիռ կողմերի ջանքերը[4],[5]։

  • 2019թ․ — «Փոխակերպելով կրթությունը»:
  • 2016 թ. — «Ճանապարհ դեպի 2030՝ վերացնել աղքատությունը և հասնել կայուն սպառնման և արտադրության»:
  • 2015 թ. — «Երիտասարդություն և քաղաքացիական մասնակցություն»։
  • 2014 թ. — «Երիտասարդություն և հոգեկան առողջություն»։
  • 2013 թ. — «Երիտասարդության միգրացիա՝ առաջընթաց զարգացման ճանապարհին»։
  • 2012 թ. — «Կառուցենք ավելի լավ երկիր. համագործակցություն երիտասարդության հետ»։
  • 2011 թ. — «Փոխենք մեր աշխարհը»։
  • 2010 թ. — «Երկխոսություն և փոխըմբռնում»։
    • 2010 - 2011 — Երիտասարդության միջազգային տարի։
  • 2009 թ. — «Կայունություն՝ մեր մարտահրավերը, մեր ապագան»։
  • 2008 թ. — «Երիտասարդությունն ու կլիմայի փոփոխությունը. ժամանակն է գործելու»։
  • 2007 թ. — «Եղիր նկատելի, եղիր լսելի. երիտասարդության մասնակցությունը հանուն զարգացման»։
  • 2006 թ. — «Աղքատության դեմ համատեղ պայքար. երիտասարդությունն ու աղքատության վերացումը»։
  • 2005 թ. — «ԵԳԾՀ+10. պարտավորությունների ապահովում»։
  • 2004 թ. — «Երիտասարդությունը սերունդների համագործակցության վրա հիմնված հասարակությունում»։
  • 2003 թ. — «Երիտասարդների համար արժանապատիվ և արդյունավետ աշխատանք ամենուրեք»։
  • 2002 թ. — «Այժմ և հանուն ապագայի. երիտասարդության գործունեությունը՝ կայուն զարգացմամբ»։
  • 2001 թ. — «Առողջապահական և գործազրկության խնդիրների լուծում»։
  • 2000 թ. — Երիտասարդության միջազգային առաջին օրվա անցկացում։

Հայաստանում[խմբագրել | խմբագրել կոդը]

Երիտասարդության միջազգային օր Կապանում․Ազգային պարերի ուսուցում Կապանի Գարեգին Նժդեհի անվան հրապարակում Սիսիանի «Որոտնա» համույթի մասնակցությամբ

Հայաստանում օրը սկսել են նշել 2000-ականների կեսերից[6]։
Միջոցառումների շարքում տեղի են ունենում ՀՀ Սպորտի և երիտասարդության հարցերի նախարարի, փոխնախարարի, վարչությունների աշխատակիցների այցեր, հանդիպումներ, քննարկումներ երիտասարդական կազմակերպությունների ու խմբերի հետ։ Մայրաքաղաքում ու մարզերում անցկացվում են երիտասարդական փառատոներ, ֆորումներ, սեմինարներ, շնորհանդեսներ, էքսպո-ցուցահանդեսներ, աշխատանքի տոնավաճառներ, մշակութային-ժամանցային միջոցառումներ և այլն։ Դրանց գերակշիռ մեծամասնությունը հանրային, բաց մասնակցային սկզբունքով, հաճախ ՏԻՄ կառույցների հետ համագործակցելով, նախապատրաստում ու իրականացնում են երիտասարդական հասարակական կազմակերպություններն ու նախաձեռնող խմբերը[7],[8]։

Արտաքին հղումներ[խմբագրել | խմբագրել կոդը]

Ծանոթագրություններ[խմբագրել | խմբագրել կոդը]