Երաժշտական խեցի (Կիսլովոդսկ)
Երաժշտական խեցին նախքան վերակառուցումը, 2013 թվական | |
Տեսակ | տեսարժան վայր |
Երկիր | Ռուսաստան |
Տեղագրություն | Կիսլովոդսկ |
Հիմնադրված է | 1896 |
Երաժշտական խեցի (ռուս.՝ Музыкальная раковина), խեցու տեսքով համերգային հարթակ Ռուսաստանի Ստավրոպոլի երկրամասի Կիսլովոդսկ քաղաքի առողջարանային հավաքասրահում։ Կառուցվել է 1896 թվականին[1]։
Պատմություն[խմբագրել | խմբագրել կոդը]
Երաժշտական խեցին կառուցվել է 1896 թվականին՝ Կիսլովոդսկ քաղաքի առողջարանային հավաքասրահի բոլոր շենքերի հետ միաժամանակ։ Շենքը կառուցվել է Եվրոպայի ամենահայտնի մշակութային կենտրոնների օրինակով։ Ճարտարապետ Եվգենի Դեսկուբեսն օգտագործել է էկլեկտիկ ոճը և ֆրանսիական նեոռենեսանսին բնորոշ ձևերը բազմաթիվ նրբագեղ դեկորատիվ տարրերով[2]։
Երկար տարիներ Խեցին ծառայել է որպես ամառային համերգային հարթակ և քաղաքի երաժշտական կյանքի կենտրոնն էր։ Այս բեմում ելույթ են ունեցել խորհրդային էստրադայի շատ աստղեր, նաև` արտասահմանցի կատարողներ[2]։
Բեմն ունեցել է շատ լավ հնչականություն, որը ստեղծվել էր ակուստիկ տանիքի եզակի կառուցվածքի և գոգավոր հետին պատի շնորհիվ, որն ուժեղացնում էր ռեզոնանսը[1]։ Խեցու շուրջ հանդիսատեսի նստատեղերն էին, որոնք միաժամանակ տեղավորում էին մեկուկես հազար մարդ։ Բաց երկնքի տակ տեղի էին ունենում սիմֆոնիկ, էստրադային համերգներ[2]։
Երաժշտական խեցին ամբողջ Կովկասյան հանքային ջրերի հպարտությունն էր։ 1990-ական թվականներին այդ մշակութային օբյեկտն անկում ապրեց։ Գրեթե 20 տարի վերականգնման հույս չկար։ Միայն 2018 թվականի հուլիսի 6-ին, վերականգնման աշխատանքների ավարտից հետո, Երաժշտական խեցին դարձյալ հավաքեց հանդիսատեսին[1][2]։
Նախատեսվում է, որ այնտեղ տեղի կունենան ֆիլմերի ցուցադրություններ, օպերաների և մյուզիքլների բեմադրություններ, ապագայում նաև` հայտնի DJ-ների մասնակցությամբ երիտասարդական երեկույթներ, դիսկոտեկներ[1][2]։
Երաժշտական խեցին հանդիսատեսի համար բաց է ապրիլից հոկտեմբեր[2]։