Բլինդաժ (ֆր.՝ blindage), պաշտպանական կառույց՝ անձնակազմը գնդացրային, հրետանային, ականանետային կրակից, նապալմից և զանգվածային ոչնչացման զենքից պաշտպանելու համար։ Բլինդաժ պատրաստում են երկաթբետոնից, փայտից, քարից, հողով լի պարկերից, արդյունաբերական արտադրության կոնստրուկցիաներից (ալեձև պողպատ և ալն)։ Բլինդաժներ առաջին անգամ օգտագործվել են Սևաստոպոլի պաշտպանության (1854–1855) ժամանակ։
Կախված առկա նյութերից՝ բլինդաժը կարող է կառուցվել հողից, փայտից, երկաթբետոնից, քարից, մետաղական կառուցվածքներից։
Հրաձգային զինափորձարաններում բլինդաժ է կոչվում հրետակոծության գոտում գտնվող անձնակազմի համար պաշտպանված տարածքը, որն իրականացնում է թիրախների սարքավորումների սպասարկումը։ Կառուցվում է փայտից, կարող է թաղված լինել գետնին միայն կիսով և չունի քողարկում։
Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 2, էջ 453)։
