Բարորակություն

Բարորականություն, տատանողական համակարգի, ռեզոնանսային հատկությունները բնութագրող մեծություն։ Չափվում է տատանողական համակարգի տատանման լրիվ էներգիայի և մեկ պարբերության ընթացքում կորցրած էներգիայի հարաբերությամբ։ Բնութագրում է տատանվող համակարգի որակը, որքան մեծ է բարորականությունը, այնքան ավելի դանդաղ են մարում տատանումները։ Բարորականությունը ընդունված է նշանակել $Q$ (լատիներեն qualitas – որակ) տառով։ $L$ ինդուկտիվություն, $C$ ունակություն և $R$ օհմական դիմադրություն ունեցող տատանողական կոնտուրում բարորականություն

$Q={\frac {1}{R}}{\sqrt {\frac {L}{C}}}={\frac {\omega L}{R}}={\frac {1}{\omega RC}}$

($\omega$-ն կոնտուրի սեփական հաճախականությունն է)։ $k$ առաձգականություն, $b$ շփման գործակից և $m$ զանգված ունեցող մեխանիկական համակարգի բարորականություն՝

$Q={\sqrt {\frac {mk}{b}}}={\frac {\omega m}{b}}$։

Բարորությամբ են բնութագրվում նաև տատանողական համակարգի քանակական հատկությունները, ընդ որում այն ցույց է տալիս, թե միևնույն հարկադրական ուժի ազդեցության տակ տվյալ համակարգի ռեզոնանսային հաճախականությունների հարկադրական տատանումների ամպլիտուդան քանի անգամ է գերազանցում շատ ցածր, ոչ ռեզոնանսային հաճախականության հարկադրական տատանումների ամպլիտուդան։ Այս հատկության վրա է հիմնված տատանողական համակարգի բարորականությունը չափելու մեթոդը։ Ռադիոհաճախականության տատանողական կոնտուրի բարորության թվային արժեքը սովորաբար 30–100 է։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 2, էջ 336)։