Օլդենբուրգցու ամառանոց (Քարե կղզի)
 | |
|---|---|
 | |
| Տեսակ | կալվածք |
| Երկիր |  Ռուսաստան |
| Տեղագրություն | Սանկտ Պետերբուրգ |
| Ժառանգության կարգավիճակ | Ռուսաստանի դաշնային մշակութային ժառանգության օբյեկտ |
 | |
 | |
Օլդենբուրգցու ամառանոց (ռուս.՝ Дача Ольденбургского, այլ անվանումը՝ Դոլգորուկովի ամառանոց, ռուս.՝ Дача Долгорукова), Ռուսաստանի Սանկտ Պետերբուրգ քաղաքի Քարե կղզում գտնվող ռուսական կլասիցիզմի ժամանակաշրջանի փայտե ճարտարապետության կարևորագույն հուշարձաններից մեկը, որը 1831-1833 թվականներին կառուցել է ճարտարապետ Սմարագդ Լոգինովիչ Շուստովը։
Հասցեն՝ Սանկտ Պետերբուրգ, Փոքր Նևկայի առափ, 11։
Պատմություն
[խմբագրել | խմբագրել կոդը]Ամառանոցը կառուցվել է արքունիքի ախոռապետ իշխան Վլադիմիր Դոլգորուկովին պատկանած հողամասում և 1833 թվականին, անմիջապես շինարարության ավարտից հետո, վաճառվել է արքայազն Պետեր (Պյոտր) Գեորգիևիչ Օլդենբուրգցուն։
Տունը գտնվում է երկու թեքամուտքով բարձր հարթակի վրա։ Սա քառակուսի հատակագծով շինություն է, որի կենտրոնում կա հյուրասենյակներով շրջապատված դահլիճ-ռոտոնդա։ Կենտրոնական դահլիճը թեք գմբեթի տակ է, որմնասյուներով բաժանվում է երկու հարկի և զարդարված է բուսանախշերով։ Շուստովի նախագծի համաձայն՝ երեք ճակատները զարդարված էին մատնեքավոր դորիական սյուներ ունեցող նախամուտքերով, որոնց հենվում էին երկրորդ հարկի պատշգամբները։ Մեծ կիսաշրջանաձև պատուհանները զարդարում էին գլխավոր ճակատը։
1830-ական թվականների վերջին - 1840-ական թվականների սկզբին ճարտարապետ Անդրեյ Շտակենշնայդերը մասամբ վերակառուցել է շենքը և վերադեկորավորել ներսույթները։ Բացի այդ, Շտակենշնայդերի նախագծով, Փոքր Նևկա գետի առափի կողմից կառուցվել է պարիսպ (1836 թվականին)[1] և իշխանին սպասարկող անձնակազմի ու թիկնազորի համար կարմիր աղյուսից կառուցվել է կողաշենք։
1928 թվականին Օլդենբուրգցու ամառանոցը, բնակարաններ ստեղծելու նպատակով, վերահատակագծվել է՝ ոչնչացնելով ներքին հարդարման մեծ մասը։ 1930 թվականին հրդեհից տուժել է տան գմբեթը, որը վերականգնվել է 1936-1937 թվականներին։ 1978 թվականին հանրակացարանի վերածված տանը կրկին հրդեհ է բռնկվել, այրվել են գմբեթը և կենտրոնական մասը։ 1982 թվականին այն ամբողջությամբ ապամոնտաժվել է և նորից կառուցվել է այլ նյութով՝ փայտե երեսվածքով[2]։ Աշխատանքներն ավարտվել են 1989 թվականին։
2017 թվականին նախատեսվում էր ամառանոցի և հարակից այգու սեփականաշնորհումը[3]։
Ծանոթագրություններ
[խմբագրել | խմբագրել կոդը]- ↑ «Дача князя В. В. Долгорукова - Дача принца П. Г. Ольденбургского - Жилой дом - Общежитие».
- ↑ «Усадьбы и дачи». Արխիվացված է օրիգինալից 2015 թ․ մայիսի 6-ին. Վերցված է 2019 թ․ մարտի 18-ին.
- ↑ «Что не нужно государству». Վերցված է 2017 թ․ փետրվարի 17-ին.