Դ'Ալամբերի սկզբունք

Ժան Լը Ռոն Դ'Ալամբեր (1717–1783)

Դ'Ալամբերի սկզբունք կամ Դ'Ալամբեր-Լագրանժի սկզբունք, մեխանիկայի հիմնական սկզբունքներից, տալիս է դինամիկայի և ստատիկայի խնդիրների լուծման ընդհանուր մեթոդ, ըստ որի, մեխանիկական համակարգի կետերի վրա ազդող ակտիվ ուժերը, կապերի hակազդումները և իներցիայի ուժերը կազմում են հավասարակշռված ուժային համակարգ։ Դ'Ալամբերի սկզբունքի համաձայն, մեխանիկական համակարգի յուրաքանչյուր $i$-րդ կետի համար $F_{j}+N_{i}+I_{i}=0$, ուր $F_{j}$-ն այդ կետի վրա ազդող ակտիվ ուժն է, $N_{i}$-ն՝ կապերի հակազդումը, $I_{i}$-ն՝ իներցիայի ուժը, որը մեծությամբ հավասար է կետի $m_{i}$ զանգվածի և $w_{i}$ արագացման արտադրյալին ($I_{i}=m_{i}w_{i}$) և ուղղված է այդ արագացմանը հակառակ։ Դ'Ալամբերի սկզբունքը հնարավորություն է ընձեռնում դինամիկայի խնդիրները լուծելիս օգտագործել ստատիկայի ավելի պարզ մեթոդներ։ Այն հարմար է, հատկապես, կապերի հակազդումները որոշելիս, երբ համակարգի շարժման օրենքը հայտնի է կամ որոշվում է համապատասխան հավասարումներից

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 3, էջ 262)։