Ֆլորեալ Ավելյանեդա
| Ֆլորեալ Ավելյանեդա իսպ.՝ Floreal Edgardo Avellaneda | |
|---|---|
| Ծնվել է | մայիսի 14, 1960 |
| Ծննդավայր | Ռոսարիո, Սանտա Ֆե նահանգ, Արգենտինա |
| Մահացել է | մայիսի 13, 1976 (15 տարեկան) |
| Մահվան վայր | Լա Պլատա |
| Քաղաքացիություն | Արգենտինա |
| Մասնագիտություն | քաղաքական գործիչ, միջնակարգ դպրոցի աշակերտ և քաղաքական ակտիվիստ |
| Կայք | justiciaparafloreal.com.ar |
Ֆլորեալ Էդգարդո Ավելյանեդա, մականունը՝ Նեգրիտո (իսպ.՝ Floreal Edgardo Avellaneda, el Negrito) մայիսի 14, 1960, Ռոսարիո, Սանտա Ֆե նահանգ, Արգենտինա - մայիսի 13, 1976, Լա Պլատա)՝ արգենտինացի ակտիվիստ, Արգենտինայի կոմունիստական կուսակցության երիտասարդական կազմակերպության անդամ, որին պետանվտանգության գործակալները առևանգել են հենց իր տնից և բանտում տանջամահ արել։
Պատմություն[խմբագրել | խմբագրել կոդը]
Նեգրիտոյի թե՛ հայրը՝ Ֆլորեալ Ավելյանեդան, թե՛ մայրը՝ Իրիս Պերեյրա դե Ավելյանեդա Էտելվինան, Արգենտինայի կոմունիստական կուսակցության անդամներ էին, մի կուսակցության, որը հալածանքների էր ենթարկվում Արգենտինայում 1950-70-ական թվականներին միմյանց հաջորդող բռնապետական վարչակարգերի կողմից։ 1976 թվականի ապրիլի 15-ին պետանվտանգության ծառայողները խուզարկություն կատարեցին նրանց տանը։ Փնտրում էին ընտանիքի հորը, որին չգտնելով՝ մորն ու որդուն տեղափոխեցին Վիլլա Մարտելի ոստիկանական բաժանմունք[1]։ Այստեղ նրանց տանջանքների ենթարկեցին՝ ստիպելով հայտնել Ֆլորեալ Ավելյանեդայի և վերջինիս կուսակից ընկերների տեղը, բայց արդյունքի չհասնելով՝ մորը նետեցին բանտ, իսկ տղային՝ Campo de Mayo ռազմական բազայի պատժախուց, որտեղ շարունակեցին տանջանքները։
Մեկ ամիս անց՝ մայիսի 16-ին, Ռոսարիո քաղաքից 300 կիլոմետր հեռավորության վրա՝ Ռիո դե լա Պլատա գետի ուրուգվայական ափին գտան պատանի Ֆլորեալի և նրա բախտակից յոթ ընկերների լլկված մարմինները՝ ահավոր, անմարդկային տանջանքների բազմաքանակ հետքերով։ Հետագայում մայրը՝ Իրիս Պերեյրա Էտելվինան, որին 1978 թվականի հուլիսին բանտից ազատ էին արձակել, պատմել է, որ չնայած գազանային բազմաթիվ տանջանքներ կրելուն՝ Ֆլորեալը չի մատնել ընկերներին, և «սև էսկադրոնի» անդամները ոչ մի տեղեկություն չեն կարողացել նրանից պոկել[2][3]։
Հանցագործների դատապարտոմը[խմբագրել | խմբագրել կոդը]
2009 թվականի ապրիլին՝ Արգենտինայի պատմության մեջ առաջին անգամ, դատաքննություն սկսվեց՝ Campo de Mayo ռազմաբազայում բռնապետական վարչակարգերի օրոք մարդկության դեմ գործված հանցագործությունները բացահայտելու և մեղավորներին պատժելու նպատակով։ Մասնավորապես՝ տասնհիգամյա Ֆլորեալ Էդգարդո Ավելյանեդային տանջամահ անելու համար դատապարտվեց ու պատժվեց վեց զինվորական ու ոստիկան։ Նրանցից մեկը դատապարտվեց ցմահ բանտարկության, մնացած հինգը՝ հանցանքի ծանրության աստիճանից ելնելով՝ 1-ից 25 տարվա ազատազրկման։
Ծանոթագրություններ[խմբագրել | խմբագրել կոդը]
- ↑ Floreal Edgardo Avellaneda «el Negrito»
- ↑ Los mismos de siempre. Página 12
- ↑ «Hablar del Negrito Avellaneda». Արխիվացված է օրիգինալից 2009 թ․ հունիսի 6-ին. Վերցված է 2018 թ․ հուլիսի 17-ին.