Ռուբի Թոմա
| Ռուբի Թոմա | |
|---|---|
| Ծնվել է | 1949 |
| Ծննդավայր | Նաուրու |
| Քաղաքացիություն |  Նաուրու |
| Կրթություն | Քրայսթչերչի Օտագո համալսարան |
| Մասնագիտություն | քաղաքական գործիչ |
| Զբաղեցրած պաշտոններ | ֆինանսների նախարար |
Ռուբի Թոմա (անգլ.՝ Ruby Thoma, 1949, Նաուրու[1]), նաուրուացի քաղաքական գործիչ։
Ավարտելով ավագ դպրոցը Ավստրալիայում՝ նա բուժքույրական կրթություն է ստացել Մելբուռնի Epworth հիվանդանոցում։ Ավարտել է Օտագոյի համալսարանի Քրայսթչըրչի բժշկական դպրոցը (անգլ.՝ University of Otago Christchurch School of Medicine ) և որպես մանկաբարձ աշխատել Նաուրուում[1]։
Մուտք գործելով քաղաքականություն՝ Ռուբի Թոման 1983 թվականին իր թեկնածությունն է առաջադրել Անետան/Եվա ընտրատարածքի ընդհանուր ընտրություններում։ Մի խումբ կամայք ընտրապայքարում աջակցում էին նրան՝ պնդելով, որ Ռուբի Թոմայի պես կրթված կինը խորհրդարանում հաջողությամբ կպաշտպանի կանանց և երեխաների շահերը։ Երկրի անկախացումից ի վեր՝ 1968 թվականից, խորհրդարանի բոլոր անդամները տղամարդիկ էին։ Նա դիմադրության է հանդիպել այդ թվում՝ կին ընտրողներից, ովքեր ասում էին, որ քաղաքականությունը պետք է թողնել տղամարդկանց, և չի հաջողել ընտրություններում[1]։
Խորհրդարանական ընտրություն
1986 թվականի ընդհանուր ընտրություններում կրկին առաջադրվելով՝ Ռուբի Թոման ընտրվել և դարձել է երկրի պատմության մեջ առաջին կին պատգամավոր[1]։ Նաուրուում քաղաքական կուսակցություններ չկային․ խորհրդարանի բոլոր անդամները հանդես էին գալիս՝ որպես անկախ անդամներ, և կազմում էին ոչ պաշտոնական կոալիցիաներ[2]։
Հետագա քաղաքական գործունեություն
Ռուբի Թոման միացել է Համմեր ԴեՌոբուրտի (անգլ.՝ Hammer DeRoburt) խորհրդարանական կոալիցիային, և 1986 թվականի դեկտեմբերից մինչև 1989 թվականի օգոստոս՝ մինչև կառավարության տապալումը, եղել է նախարար։ Նա պահպանել է իր տեղը խորհրդարանում հաջորդ ընդհանուր ընտրություններում և կորցրել է մանդատը 1992 թվականի ընտրություններում[1]։ Հիմնել է «Ժողովրդի շարժում» ասոցիացիան (անգլ.՝ People's Movement Association)՝ ընդդիմանալով նախագահ Բերնարդ Դոուիյոգոյի (անգլ.՝ Bernard Dowiyogo) պետական միջոցների վատնման քաղաքականությանը։ Քանի որ նա հանրային սեկտորի աշխատող էր, նրան ազատել են մանկաբարձի աշխատանքից[3]։ 1995 թվականի ընդհանուր ընտրություններում կրկին ընտրվել է խորհրդարանում։ 1996 թվականի նոյեմբերից մինչև դեկտեմբեր Ռուբի Թոման եղել է Նաուրուի նախագահի օգնական նախարար Քենան Ադեանգի (անգլ.՝ Kennan Adeang) աշխատակազմում և միաժամանակ զբաղեցրել ֆինանսների նախարարի պաշտոնը[4]։ Այնուամենայնիվ, նա կորցրել է իր մանդատը 1997 թվականին, և ավարտել իր քաղաքական կարիերան[5]։
Պատմության մեջ ունեցած դերը
Իր կարիերայի ընթացքում Ռուբի Թոման միակ կին պատգամավորն է եղել։ Մինչ Շարմեն Սքոթի (անգլ.՝ Charmaine Scotty) ընտրությունը 2013 թվականի ընդհանուր ընտրություններում, ոչ մի այլ կին չի ընտրվել խորհրդարանում[6][7]։
2000-ականների վերջին եղել է սահմանադրական բարեփոխումների առաջարկների վերահսկման հանձնաժողովի պատասխանատու։ Նախատեսված բարեփոխումները ի վերջո չեն իրականացվել, քանի որ մերժվել են 2010 թվականի փետրվարին կայացած հանրաքվեում[8]։
Ծանոթագրություններ
- ↑ 1,0 1,1 1,2 1,3 1,4 Developing a More Facilitating Environment for Women’s Political Participation in Nauru Արխիվացված 2013-03-06 Wayback Machine, South Pacific Forum
- ↑ Nauru : 1986 and 1987 elections, Inter-Parliamentary Union
- ↑ Jean Drage, "Women's representation in the Pacific Islands", in Werner vom Busch et alii (eds.), New Politics in the South Pacific, University of the South Pacific, 1994, 982-02-0115-2, p.170
- ↑ «Assignment of Responsibility for the Business of Government : December 1996» (PDF). Ronlaw.gov.nr. Nauru Government Gazette. Վերցված է 24 October 2017-ին.
- ↑ "Nauru: past national women in politics", Pacific Women in Politics
- ↑ "Nauru gets second woman MP, first in nearly 30 years", Radio New Zealand International, 9 June 2013
- ↑ "Second woman ever elected to Nauru parliament", Radio Australia, 9 June 2013
- ↑ "Summary of the Report of Select Committee on Constitutional Amendment Bills", government of Nauru, 10 March 2009