Սասունիկ Ավդալյան

Վիքիպեդիայից՝ ազատ հանրագիտարանից
Jump to navigation Jump to search
Սասունիկ Վաղարշակի Ավդալյան
Ծնվել է1920
Ծննդավայրգ. Հոռոմ
Ազգությունհայ

Սասունիկ Վաղարշակի Ավդալյան (1920, գ. Հոռոմ - ), հայ մանկավարժ, Երկրորդ համաշխարհային պատերազմի մասնակից:

Կենսագրություն[խմբագրել | խմբագրել կոդը]

1937 թվականին ավարտել է Լենինականի մանկավարժական ուսումնարանը և անցել ուսուցչական աշխատանքի: 1940 թվականին կանչվել է զինվորական ծառայության: Հայրենական մեծ պատերազմին մասնակցել է 1941 թվականի հունիսի 22-ից: Այդ ժամանակ նրանց զորամասը Պրուտ գետի ափին էր, Ունգեն քաղաքի մոտակայքում: Մեկ ամիս հակառակորդի դեմ կռվելուց հետո նրան գործուղել են Օդեսա՝ հրամանատարական դասընթացների: Դասընթացները չավարտած՝ նրան ուղարկում են Վոլխովի ռազմաճակատ որպես ականանետի հրամանատար: Վոլխովի ռազմաճակատում նա մարտնչում է մինչև 1942 թվականի հուլիսի կեսերը, այնուհետև՝ թշնամու թիկունքում, Լենինգրադի մարզում գործող 13-րդ պարտիզանական բրիգադի կազմում՝ որպես հետախուզական խմբի հրամանատար: 1944 թվականի փետրվարից մինչև պատերազմի ավարտը կռվել է Լենինգրադի, 1-ին Ուկրաինական ռազմաճակատներում, 125-րդ հրաձգային դիվիզիայի 749-րդ գնդի ականանետային մարտկոցում: Մասնակցել է Լենինգրադի շրջափակման վերացման և Մերձբալթիկայի ազատագրման մարտերին: Երեք անգամ վիրավորվել է: Զորացրվել է 1945 թվականի հոկտեմբերին:

Ավարտել է Երևանի հեռակա մանկավարժական ինստիտուտի լեզվագրական ֆակուլտետը: Երեք ու կես տասնամյակ Արթիկի շրջանի դպրոցներում վարել է ուսմասվարի, տնօրենի պաշտոններ, միաժամանակ դասավանդել հայոց լեզու և գրականություն:

Արժանացել է «Խիզախության համար», «Մարտական ծառայությունների համար» և այլ մեդալներով, ինչպես նաև ՀԽՍՀ Գերագույն խորհրդի երկու պատվոգրերով[1]:

Ծանոթագրություններ[խմբագրել | խմբագրել կոդը]

  1. Ա. Հ. Հարությունյան, Հ. Ս. Մելքումյան, Ա. Ղ. Սուքիասյան, Հայաստանի ուսուցիչները մեծ Հայրենականում, գիրք 2, Ե., «Լույս», 1982, էջ 16-17: