Մուհամմադ Դեյֆ
Մուհամմադ Դեյֆ | |
---|---|
արաբ․՝ محمد دياب إبراهيم المصري | |
օգոստոսի 12, 1965 (58 տարեկան) - | |
Ծննդավայր | Խան Յունիս, Գազայի հատված |
Քաղաքացիություն | Պաղեստին |
Մարտեր/ պատերազմներ | Արաբա-իսրայելական հակամարտություն |
Մուհամմադ Դիաբ Իբրահիմ Դեյֆ (արաբ․՝ محمد دياب إبراهيم المصري, հայտնի է որպես Մուհամմադ Դեյֆ կամ Աբու Խալիդ[1], օգոստոսի 12, 1965, Խան Յունիս, Գազայի հատված[1][2]), պաղեստինցի ահաբեկիչ, 1996 թվականից[1], մի շարք երկրներում ահաբեկչական կազմակերպություն ճանաչված ՀԱՄԱՍ իսլամիստական կազմակերպության ռազմական թևի հրամանատար։ Իսրայելում Դեյֆը համարվում է ամենավտանգավոր ահաբեկիչներից մեկը, ով անձամբ բազմաթիվ ահաբեկչություններ է ծրագրել խաղաղ քաղաքացիների դեմ[3]։
Կենսագրություն[խմբագրել | խմբագրել կոդը]
Եղել է Յահյա Այաշի աշակերտը. զբաղեցրել է Իզ ադ-Դին ալ-Կասսամ խմբերի ղեկավարի պաշտոնը իր նախորդի՝ Սալահ Շեհադեի մահից հետո։
Այաշի մահից հետո Դեյֆի ղեկավարությամբ ՀԱՄԱՍ-ը մի շարք ահաբեկչություններ է իրականացրել։ Դեյֆը պատասխանատու է նաև իսրայելցի զինվորների առևանգման համար, որոնցից առավել մեծ ճանաչում է ձեռք բերել Նախշոն Վաքսմանի առևանգումն ու սպանությունը։ 1996 թվականին մի շարք ահաբեկչություններից հետո, երբ մեկ շաբաթվա ընթացքում զոհվեց 58 խաղաղ քաղաքացի, Դեյֆը անհետացավ, և շատերը կարծում էին, որ նա գտնվում է Եգիպտոսում։ Բայց երկու տարի անց, այն ծանր վիճակի պատճառով, որում գտնվում էին Պաղեստինի ռազմական կազմակերպությունները իրենց առաջնորդներից շատերի ոչնչացումից հետո, Դեյֆը ստիպված էր կրկին զբաղվել Գազայի հատվածից ահաբեկչությունների նախապատրաստմամբ։
Արտաքին տեսաֆայլեր | |
---|---|
Իսրայելի պաշտպանության բանակի մամուլի ծառայություն։ Տեսանյութ։ | |
Իսրայելի ռազմաօդային ուժերը թիրախային հարվածով սպանում են Ահմեդ Ջաբարիին |
Իսրայելի հատուկ ծառայությունները յոթ անգամ փորձել են ոչնչացնել նրան, բայց Դեյֆին ամեն անգամ հաջողվել է խուսափել մահից։ 2002 թվականին, իր մեքենայի մեջ հրթիռի ուղիղ հարվածի արդյունքում, Դեյֆը կորցրեց աչքն ու ձեռքը։ 2006 թվականին իսրայելական հարձակման հետևանքով, այն տան վրա, որտեղ տեղի էր ունենում ՀԱՄԱՍ-ի առաջնորդների հանդիպումը, ըստ չհաստատված տեղեկությունների, նա կաթվածահար է եղել։
Իսրայելական հատուկ ծառայությունները կարծում են, որ Սուֆա և Քերեմ Շալոմ անցակետերում իսրայելցի զինվորականների վրա հարձակումը, 2006 թվականի հունիսին զինծառայող Գիլադ Շալիթի առևանգումը ծրագրվել են Մոհամմադ Դեյֆի կողմից։ Նա շարունակում է մնալ ՀԱՄԱՍ-ի մարտական թևի փաստացի առաջնորդը, իսկ նրա ազդեցությունն աճել է 2012 թվականի աշնանը իսրայելցի զինվորականների կողմից Ահմեդ Ջաբարիի վերացումից հետո[4]։
2014 թվականի օգոստոսի 19-ին իսրայելական ավիացիան 3 ռումբ է նետել Գազայի հատվածում ոմն Ահմեդ Յասին Դալուի տան վրա[5], որտեղ ենթադրաբար գտնվել են Դեյֆը և նրա կանանցից մեկը (27 տարեկան), նրանց դուստրը (3 տարեկան) և որդին (7 ամսական)։ Օգոստոսի 21-ի գիշերը Գազայի պաղեստինյան լրատվական գործակալությունը հրապարակել է բժշկական տեղեկանք, ըստ որի՝ Դեյֆը, նրա կինն ու որդին մահացել են Շիֆա հիվանդանոցում՝ իսրայելական հարվածից հետո։ ՀԱՄԱՍ-ը հերքում է այդ տեղեկությունը[6]։
Ծանոթագրություններ[խմբագրել | խմբագրել կոդը]
- ↑ 1,0 1,1 1,2 «ЦАХАЛ предпринял попытку ликвидации лидера боевиков ХАМАС Мухаммада Дэйфа». Արխիվացված օրիգինալից 2014 թ․ օգոստոսի 21-ին. Վերցված է 2014 թ․ օգոստոսի 20-ին.
- ↑ «محمد الضيف.. مُقعد يقود القسام». Արխիվացված օրիգինալից 2018 թ․ օգոստոսի 10-ին. Վերցված է 2014 թ․ օգոստոսի 20-ին.
- ↑ «Израиль и ХАМАС вновь начали взаимные обстрелы». Արխիվացված օրիգինալից 2014 թ․ օգոստոսի 23-ին. Վերցված է 2014 թ․ օգոստոսի 20-ին.
- ↑ «Лапид: «Мы будем искать Мухаммада Дэйфа, и мы найдём его»». Արխիվացված օրիգինալից 2016 թ․ մարտի 4-ին. Վերցված է 2014 թ․ օգոստոսի 10-ին.
- ↑ «Израиль подтвердил: мы целились в Дейфа». Արխիվացված օրիգինալից 2014 թ․ օգոստոսի 22-ին. Վերցված է 2014 թ․ օգոստոսի 21-ին.
- ↑ «В Интернете появилось свидетельство о смерти главного террориста ХАМАСа». Արխիվացված օրիգինալից 2014 թ․ օգոստոսի 22-ին. Վերցված է 2014 թ․ օգոստոսի 21-ին.
Արտաքին հղումներ[խմբագրել | խմբագրել կոդը]