Գևորգյան մարտարվեստի դպրոց

Գևորգյան մարտարվեստի դպրոց
Հիմնադրված	2010 թ. ապրիլի 18
Հիմնադիրներ	Գևորգ Գևորգյան
Տեղագրություն	ՀՀ, ք. Երևան, Մոսկովյան 5
գործունեության որլորտ	Մարտարվեստի ուսուցանում, Մարմնակրթություն, Ռազմահայրենասիրական դաստիարակություն
Կարգախոս	Կանխի´ր ագրեսիան, վերահսկի´ր իրավիճակը

Գևորգյան մարտարվեստի դպրոց` հայրենասիրական-երիտասարդական կենտրոն։ Կենտրոնի շրջանակներում գործում են հայկական մարտաոճի ուսուցման դպրոցը, նույնանուն հասարակական կազմակերպությունը (ԳՄԴ ՀԿ) և «Ազատամարտի մասնակիցների միավորում» (ԱՄՄ) կրթական կառույցը։

Պատմություն

Գևորգյան մարտարվեստի դպրոցը 2010 թվականին հիմնադրել է ազատամարտիկ Գևորգ Գևորգյանը։

Նույնանուն հասարակական կազմակերպությունը հիմնադրվել է 2011 թվականի դեկտեմբերի 16-ին, պետական գրանցում ստացել՝ 2012 թվականի հունվարի 19-ին։

Հետագայում հիմնադիրն իր շուրջն է համախմբել նաև իր մարտական ընկերներին՝ կենտրոնին կից ստեղծելով «Ազատամարտի մասնակիցների միավորում» կրթական կառույցը, որն իր աշխատանքները սկսել է իրականացնել 2012 թվականին, իսկ համակարգված և հստակ ծրագրով գործում է 2014 թվականի ապրիլից։ ԱՄՄ կառույցի նպատակը՝ կրթական գործունեություն ծավալելով, փորձի և գիտելիքի համակարգված փոխանցումն է երիտասարդ սերնդին։ ԱՄՄ կառույցի շրջանակում դասավանդում են պատերազմի բովով անցած և այսօր էլ ռազմագիտության ոլորտը ներկայացնող մասնագետներ։

Յուրաքանչյուր տարի կենտրոնում ուսանում են բազմաթիվ մարդիկ, որոնց թվում նաև օտարերկրացիներ։

Կենտրոնի գործունեությունն ու հիմնադրի անցած ուղին ներկայացված է տարիներ առաջ նկարահանված «Գաղափարի ուժը» փաստագրական ֆիլմում։

Կենտրոնի նպատակները

Կենտրոնի գլխավոր առաքելությունն ու նպատակն է ազգային, մտավոր և մարմնակրթական դաստիարակության միջոցով խորին հարգանք սերմանել երկրի, պետականության, բանակի, ազգային արժեքների նկատմամբ։

Կենտրոնն իր առաջ խնդիր է դրել.

• Խթանել մարմնակրթությունը հայկական մարտարվեստի միջոցով,
• Նպաստել երիտասարդության շրջանում մտքի, հոգու և ֆիզիկական ամրության եռամիասնության գաղափարի տարածմանը,
• Կազմակերպել պարբերաբար հավաք-քննարկումներ, որոնք կամրապնդեն սերունդների միջև կապը,
• Նպաստել ազգային մտածողությամբ անհատի ձևավորմանը՝ վերջինիս դիտարկելով որպես զարգացած հասարակության կարևորագույն բաղադրիչ,
• Գործունեությամբ նպաստել «բանակն ու պետությունը որպես բացարձակ ազգային արժեք» գաղափարի տարածմանն ու ամրապնդմանը։

Կենտրոնի կրթական ծրագիրը

Գևորգյան մարտարվեստի դպրոց հայրենասիրական-երիտասարդական կենտրոնի սաները միաժամանակ ուսումնասիրում, սերտում են՝

• Հայկական մարտարվեստ
• Ռազմագիտություն
• Կրակային պատրաստվածություն՝ տեսական և գործնական
• Քարտեզագրություն
• Հայ մշակույթ
• Հայոց կրոն
• Ազգային գաղափարախոսություն։

Կենտրոնում պարբերաբար կազմակերպվում են համաժողովներ, բաց դաս-քննարկումներ, ինչպես նաև «Ճանաչենք նրանց» խորագրով երիտասարդների և արցախյան պայքարի մարտիկների հանդիպումների շարք։

Արտաքին հղումներ

1. Գևորգյան մարտարվեստի դպրոցի պաշտոնական տեսաալիք