Տերևաթափ թուփ է, որի տարեկան ընձյուղները հասնում են մինչև 1,5-2 մ երկարության, աղեղնաձև կորացած են, արևի տակ կարմրող, մերկ են, հնգանկյուն։ Փշերը բազմաթիվ են, խիստ կեռ, լայն, կողքերից սեղմված, կտուցանման։ Տերևները հնգամասն են, վերևի կողմից մերկ, ներքևից մոխրաթաղիքապատ, ծայրային տերևիկը ունի մինչև 10 սմ երկարություն և 7 սմ լայնություն, հակառակ ձվաձև է, սրածայր, հիմքում թույլ սրտաձև, կոթունավոր (2-3, երբեմն՝ 5 սմ երկարությամբ), ամբողջաեզր։ Կողմնային տերևիկներն էլիպսաձև են, հակառակ ձվաձև, հազվադեպ շեղանկյունաձև, սրածայր, մանր սղոցաեզր։ Ծաղկակիր ընձյուղը թեթևակի անկյունավոր է։ Ծաղկաբույլերը ծայրային են, բազմածաղիկ։
Տարածված է Կովկասում, Արևմտյան Հայաստանում։ Հայաստանի պայմաններում հանդիպում է հյուսիսարևելյան շրջաններում, ստորին և միջին լեռնային գոտիներում, ենթանտառների եզրերին, գետափերին[1]։
