Հովհաննես Մաճկալյանը «Ուլիս» ակումբի սան է։ Տասնյոթ տարեկանում ընդգրկվել է «Ուլիսի» կազմում՝ մասնակցելու Հայաստանի առաջնությանը։ Առաջին անգամ ընդգրկվել է հինգերորդ տուրի՝ «Արարատ» ակումբի դեմ խաղի հայտացուցակում, որտեղ նրա թիմը պարտվել է 1:2 հաշվով։ Այդ խաղում էլ Մաճկալյանը կատարել է իր նորամուտը թիմի կազմում՝ ավելացված ժամանակում (91-րդ րոպե) փոխարինելով Արամ Բարեղամյանին[1]։ Աստիճանաբար մարզչական շտաբը Մաճկալյանին հնարավորություն է տվել համագործակցել իր թիմակիցների հետ։ Ամռանը՝ հուլիսի 24-ին, Մաճկալյանը մասնակցել է Չեմպիոնների լիգայի՝ Տիրասպոլի«Շերիֆ» ակումբի դեմ խաղին։ Խաղն ավարտվել է Մաճկալյանի թիմի պարտությամբ (0:1), և երկու խաղերի արդյունքով հաջորդ փուլ է անցել հակառակորդը[2]։ Սեպտեմբերի 24-ին՝ Հայաստանի Սուպերգավաթի խաղարկության շրջանակներում անցկացվող հանդիպման 112-րդ րոպեին փոխարինել է Ջուլիանո Խիմենեսին։ Հանդիպումն ավարտվել է 0։0 հաշվով, և 11 մետրանոցների արդյունքում հաղթել է «Միկան»[3]։
«Ուլիսի» կազմում մասնակցելով տարբեր մրցաշարերի՝ Հովհաննես Մաճկալյանն արժանացել է Հայաստանի մինչև 19 տարեկանների հավաքականի մարզչական շտաբի ուշադրությանը։ 2012 թվականի հոկտեմբերի 9-ին կատարել է իր նորամուտը մինչև 19 տարեկանների հավաքականում՝ մասնակցելով 2009 թվականի Եվրոպայի առաջնության որակավորման փուլի՝ Շոտլանդիայի հավաքականի դեմ խաղին։ Մաճկալյանը խաղադաշտ է դուրս եկել հադիպման վերջում՝ խաղի 84-րդ րոպեին փոխարինելով Սարգիս Շահինյանին։ Այդ խաղում հայ պատանիները կրել են խոշոր հաշվով պարտություն (0:4)[4]։ Հաջորդ խաղը Մաճկալյանն անցկացրել է պահեստայինների նստարանին (այդ խաղը նույնպես ավարտվել է 0:4 հաշվով պարտությամբ), իսկ երրորդ հանդիպմանը Մաճկալյանը խաղադաշտ է դուրս եկել առաջին րոպեներից և խաղալով մինչև հինգերորդ րոպեն՝ իր տեղը զիջել է Ալբերտ Զոհրաբյանին։ Սկզբում խաղն ընթացել է ոչ-ոքի, սակայն 82-րդ րոպեին ռումինացիներին հաջողվել է գրավել Հայաստանի դարպասը[5][6]։