Երաժշտական կոմեդիա

Մերիլին Մոնրոն «Ջենտլմենները նախընտրում են շիկահերներին» երաժշտական կատակերգությունում

Երաժշտական կոմեդիա, կատակերգական հիմքով երաժշտաբեմական ստեղծագործություն։ Ընդհանրացնում է երաժշտաբեմական ժանրերը (օպերա-բուֆֆ, օպերետ, կոմիկական օպերա, կոմեդիա-բալետ, վոդևիլ, մյուզիքլ և այլն)։ Միջնադարում «կոմեդիա» եզրույթով անվանել են առավելապես երջանիկ ավարտ ունեցող բեմական ներկայացումները, XVII դարում՝ իտալական բոլոր օպերաները՝ անկախ բովանդակությունից։

Ձևավորում

Որպես երաժշտական թատրոնի ինքնուրույն ժանր՝ ձևավորվել է XIX դարի վերջին և XX դարի սկզբին։ Ի տարբերություն օպերետի՝ երաժշտական կոմեդիայի երաժշտությունը սերտորեն կապված չէ բովանդակության զարգացման հետ. նրա մեջ հազվադեպ են երաժշտական ծավալուն՝ անսամբլի, մեներգերի, երգչախմբի հետ միահյուսված տեսարանները։ Երաժշտական կոմեդիան կարող է ընդգրկել երգի տարբեր ժանրեր և կենցաղային պարեր։ Երաժշտական կոմեդիաներ բեմադրվում են նաև Հակոբ Պարոնյանի անվան երաժշտական կոմեդիայի պետական թատրոնում։

Այս հոդվածի կամ նրա բաժնի որոշակի հատված վերցված է «Հայ երաժշտության հանրագիտարանից», որի նյութերը թողարկված են՝ Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։