Գյուղատնտեսական արտադրության մասնագետի ավտոմատացված աշխատատեղ
Գյուղատնտեսական արտադրության մասնագետի ավտոմատացված աշխատատեղ, անհատական (կամ կոլեկտիվ) աշխատատեղ, ծրագրային տեխնոլոգիայի համար համալիր, որը նախատեսված է գյուղատնտեսական գործունեության որոշակի տեսակն ավտոմատացնելու համար։
Նկարագրություն[խմբագրել | խմբագրել կոդը]
Ավտոմատացված աշխատատեղի միավորում է այն ծրագրային-ապարատային միջոցները, որոնք ապահովում են մարդու և համակարգչի համագործակցությունը և հնարավորություն են տալիս ներանցել տեղեկություններ (համակարգչի ստեղնաշարի մկնիկի, տեսածրիչի և այլնի միջոցով) և արտանցել դրանք տեսասարքի (մոնիտորի), տպիչի էկրանի վրա։ Ավտոմատացված աշխատատեղի հնարավորություն է տալիս ամբողջապես կամ մասնակիորեն ավտոմատացնել մասնագետի այն գործառույթները, որոնք կապված են առաջնահերթ հաշվառման փաստաթղթերի նախապատրաստման, տնտեսական տեղեկությունների հավաքման ու մշակման, ընդունված լուծումների ձևակերպման, վիճակագրման, հաշվապահական, պլանավորման և այլ տեղեկությունների ձևակերպման ու վերադաս մարմինների փոխանցման հետ։ Ավտոմատացված աշխատատեղեր ստեղծվում են գյուղատնտեսական արտադրության կառավարման բոլոր մակարդակներում։ Այն հնարավորություն է տալիս մասնագետին նվազագույն քանակի միջանկյալ փաստաթղթերով ու առավելագույն հավաստիությամբ կատարել իր հիմնական գործառույթները։ Օրինակ՝ գյուղատնտեսի ավտոմատացված աշխատատեղը ապահովում է ցանքաշրջանառության լավագույն տարբերակի արագ ընտրությունը՝ եղած տարածքների, դրանց չափերի ու եզրաձևերի, հողի գյուղատնտեսական հատկությունների, տարատեսակ արտադրանքի արտադրության պլանավորման խնդիրների, պարարտանյութերի, պեստիցիդների առկայության, սպասվող եղանակային պայմանների, բերքատվության նվաճված մակարդակի և այլ ազդակների համադրման միջոցով։ Համակարգչի հիշողության մեջ պահվում են բոլոր տեղեկատվական, նորմատիվային և այլ տվյալներ, որոնք կապված են գյուղատնտեսական արտադրանքի հետ։ Օրինակ՝ ավտոմատացված աշխատատեղի հանձնարարականներ է տալիս հանքային պարարտանյութերի և պեստիցիդների բաշխման, ներմուծման ժամկետների վերաբերյալ, որոշում է աշխատանքների կատարման ժամկետներն ու հաջորդականությունը, վարում է կատարված աշխատանքների հաշվառում և այլն։ Հաշվապահական ավտոմատացված աշխատատեղի, ըստ մշակված առաջնային փաստաթղթերի տվյալների և հաշվապահական այլ տեղեկությունների, հաշվետվության շրջանում ձևավորում է ձեռնարկության ամփոփիչ հաշվեկշիռը և այլն։ Ավտոմատացված աշխատատեղի հիմնական առավելություններն են՝ մասնագետների աշխատանքի արտադրողականության աճը 1,5–3 անգամ՝ հաշվողական, վերահսկիչ և ձևակերպման գործողությունների ավտոմատացման հաշվին, նրանց աշխատանքի որակի բարելավումը՝ ընդունված լուծումների բազմատարբերակային մշակման շնորհիվ, տեղեկությունների հավաստիության աճը, անցումն առանց թղթի կառավարման տեխնոլոգիայի։
Այս հոդվածի կամ նրա բաժնի որոշակի հատված վերցված է «Գյուղատնտեսական հանրագիտարանից», որի նյութերը թողարկված են՝ Քրիեյթիվ Քոմմոնս Նշում-Համանման տարածում 3.0 (Creative Commons BY-SA 3.0) թույլատրագրի ներքո։ 
|