Պետրոզավոդսկի բազային բժշկական քոլեջ
| Պետրոզավոդսկի բազային բժշկական քոլեջ | |
|---|---|
 | |
 | |
| Տեսակ | քոլեջ |
| Հիմնադրված է | 1899 |
| Երկիր |  Ռուսաստան |
| Տեղագրություն | Պետրոզավոդսկ |
| Կայք | medcol-ptz.ru |
Պետրոզավոդսկի բազային բժշկական քոլեջ (ռուս.՝ Петрозаводский базовый медицинский колледж), միջին մասնագիտական կրթության պետական հաստատություն, Ռուսաստանի Կարելիայի Հանրապետության հնագույն բժշկական ուսումնական հաստատությունը, գտնվում է Պետրոզավոդսկում։
Պատմություն
[խմբագրել | խմբագրել կոդը]Բացվել է 1899 թվականի նոյեմբերի 10-ին, Օլոնեցի նահանգի մանկավարժական դասընթացների հիման վրա՝ որպես բուժակների դպրոց։
Դպրոցը սկզբնապես գտնվում էր Ռուտկովսկու տանը, զեմստվոյի հիվանդանոցից ոչ հեռու։
Դպրոցի առաջին տնօրեն է նշանակվել նահանգային բժշկական տեսուչ Մաքսիմիլիան Նիկոլաևիչ Մոտրոխինը, ուսուցիչներ՝ կրոնագիտության՝ Ի. Բոգոսլովսկին, լատիներենի՝ Վ. Վ. Յանովսկին, ֆիզիկայի՝ Ի. Դ. Լամանսկին, կենդանաբանության և բուսաբանության՝ Ա. Ֆ. Կիրիկովան, դեղագործության և դեղագործական քիմիայի՝ Ա. Ի. Վվեդենսկին, ֆիզիոլոգիայի՝ Մ. Ն. Մոտրոխինը և դեղաբանության՝ Է. Խ. Նեյլանդը։
Դպրոց ընդունվել է 7 աշակերտ։ Դպրոցի կանոնադրությունը հաստատվել է 1899 թվականի հոկտեմբերի 13-ին։ Կանոնադրության համաձայն՝ դպրոցը պահվել է զեմստվոյի և ուսման վարձի հաշվին։
Ուսման վարձը վճարվել է յուրաքանչյուր կիսամյակից առաջ։ Նահանգային զեմստվոյական վարչությունն իրավունք ուներ կրճատելու աշակերտների ուսման վարձը կամ ազատելու այդ վճարից՝ հատուկ հաջողությունների համար։
Դպրոց ընդունվում էին 16 տարին լրացած և 21-ից ոչ մեծ տղաները, որոնք ներկայացնում էին արական գիմնազիաների և ռեալական ուսումնարանների առնվազն 4 դասարանների կամ քաղաքային և հոգևոր ուսումնարանների լիարժեք դասընթացների բավարար գիտելիքների մասին վկայականներ[1]։
Հետագայում դպրոց սկսեցին ընդունվել նաև կանայք[2]։ Ուսուցումը դպրոցում եռամյա էր։
Հոկտեմբերյան հեղափոխությունից հետո դպրոցը վերափոխվեց Պետրոզավոդսկի բժշկական թեքումով 3-րդ աստիճանի քաղաքային բանվորագյուղացիական դպրոցի, 1920 թվականին՝ բուժակամանկաբարձական դպրոցի, 1930-ական թվականներից՝ Կարելիայի առաջին բժշկական պոլիտեխնիկում, 1937 թվականից՝ դոկտոր Ի. Ա. Շիֆի անվան բուժակամանկաբարձական դպրոց (բժշկագիտության դոկտոր Իսաակ Ալեքսանդրովիչ Շիֆն ուսումնական հաստատությունը ղեկավարել է 1903-1922 թվականներին)։
1953 թվականից դպրոցը սկսեց կոչվել Պետրոզավոդսկի բժշկական ուսումնարան, իսկ 1994 թվականի դեկտեմբերի 15-ից դպրոցը վերափոխվել է բազային բժշկական քոլեջի[3]։
Ուսումնական հաստատությունում դասավանդել են հայտնի բժիշկներ Ի. Մ. Ռյասենցևը, Մ. Ն. Զավոդովսկին, Վ. Ա. Բարանովը, Կ. Ա. Գուտկինը, Մ. Դ. Իսերսոնը, Ե. Ֆ. Լուգովսկոյը, Զ. Մ. Իսերսոնը, Ն. Դ. Ցալը, Մ. Դ. Ժուրավլյովը, Զ. Ի. Տոլկաչովան և ուրիշներ։
Մասնագետների նախապատրաստումը քոլեջում տարվում է «Բուժական գործ», «Մանկաբարձական գործ», «Քույրական գործ» մասնագիտություններով։
Ծանոթագրություններ
[խմբագրել | խմբագրել կոդը]- ↑ Открытие фельдшерской школы // Олонецкие губернские ведомости, 1899, 17 ноября.
- ↑ Отчет фельдшерской школы за 1908—1909 гг. Олонецкие губернские ведомости. 1909. 10 декабря
- ↑ Логвиненко Е. Петрозаводскому медицинскому колледжу исполнилось 115 лет
Գրականություն
[խմբագրել | խմբագրել կոդը]- Здравоохранение Карельской АССР: Сборник статей / Ред. С. А. Вишневский, С. М. Левин. — Петрозаводск, 1970. Вып. 7
- Карелия: энциклопедия: в 3 т. / гл. ред. А. Ф. Титов. Т. 2: К — П. — Петрозаводск: ИД «ПетроПресс», 2009. С. 206—464 с.: ил., карт. ISBN 978-5-8430-0125-4 (т. 2)