Արտավազդ Բրինձյան
Արտավազդ Բրինձյան | |
---|---|
Ծնվել է | 1898 |
Ծննդավայր | Թիֆլիս, Ռուսական կայսրություն |
Մահացել է | 1920 |
Մահվան վայր | Թիֆլիս, Վրաստանի Դեմոկրատական Հանրապետություն |
Կրթություն | Ներսիսյան դպրոց |
Արտավազդ Կյուրեղի Բրինձյան (Հովհաննիսյան, 1898, Թիֆլիս, Ռուսական կայսրություն - 1920, Թիֆլիս, Վրաստանի Դեմոկրատական Հանրապետություն), հայ հեղափոխական, կուսակցական գործիչ։
Կենսագրություն
[խմբագրել | խմբագրել կոդը]Ծնվել է Թիֆլիսում, գրաշարի ընտանիքում։ Հայրը աշխատել է սկզբում Ռոտինյանի տպարանում, ապա՝ հին գրքեր վաճառողի խանութում։ 1911 թվականին ընդունվում է Ներսիսյան դպրոց, որտեղ դառնում է առաջադեմ աշակերտներից մեկը։ Բարձր դասարաններում ներգրավվում է հեղափոխական գործունեության մեջ։ Իր հոր գրավաճառանոցը նրան «գաղտնարան» է ծառայում, որտեղ գրքեր վաճառելու պատրվակով ընդհատակյա աշխատողների հանդիպումներ է կազմակերպում, թռուցիկներ տարածում։ Մի քանի անգամ Արտիստական թատրոնի գալյորկայից ներկայացման ժամանակ նա թռուցիկներ է շպրտել դեպի պարտերը։ Նրա բնակարանում հաճախ գաղտնի ժողովներ և խորհրդակցություններ են անցկացվել։
1918 թվականին ընդունվելով բոլշևիկյան կուսակցության շարքերը՝ Բրինձյանը կատարել է Թիֆլիսի կոմիտեի հանձնարարությունները։ Իսկ 1920 թվականի մայիսին նրան է հանձնարարված եղել մի խումբ ընկերների հետ զինված հարձակում գործել Թիֆլիսի յունկերական դպրոցի վրա և գրավել այն։ Հենց այդ գործողության ժամանակ Արտավազդը վիրավորվում է և ձերբակալվում։ Նույն գիշերը Բրինձյանին գնդակահարում են մենշևիկյան բանտում։ Ինչպես վկայել է Բրինձյանի եղբայրը, պահնորդական բաժնի աշխատակիցները խուզարկում են նրա բնակարանը և այնտեղից տանում հրացաններ ու ատրճանակներ, թռուցիկներ և գաղտնի գրականություն, իսկ նրա հոր գրավաճառանոցից՝ «3 ֆուրգոն գրականություն»։
Բրինձյանի գործունեության մասին գրված է Ս. Վարդանյանի «Ընդհատակում» գրքում (1926), Գ. Քալաշյանի «Թիֆլիսի ընդհատակում» հուշերում (1958), ինչպես նաև «Լենինսկոյե զնամյա» լրագրի 1963 թվականի հոկտեմբերի 20-ի համարում լույս տեսած Ս. Առաքելյանի հոդվածում[1]։
Ծանոթագրություններ
[խմբագրել | խմբագրել կոդը]- ↑ Անմոռաց դեմքեր (Ներսիսյան դպրոցի սաներ), Ե., «Հայաստան», 1965, էջ 32-35։