Ռաուլի օրենքներ

Ռաուլի օրենքներ, լուծիչի հագեցած գոլորշիների ճնշման և լուծույթի եռման (սառման) ջերմաստիճանի կախումը լուծույթի կոնցենտրացիայից արտահայտող քանակական օրինաչափություններ։ Փորձառական եղանակով հայտնաբերել է Ֆ․ Ռաուլը։

Լուծիչի հագեցած գոլորշիների պարցիալ ճնշման հարաբերական փոքրացումը հավասար է լուծված նյութի մոլային բաժնին $(x_{2})$` ${{{\rm {(}}P_{1}^{o}-P_{1}{\rm {)}}} \over {P_{1}^{o}}}=x_{2}$, որտեղ $P_{1}^{o}$-ը և $P_{1}$-ը լուծիչի գոլորշիների ճնշումներն են մաքուր լուծիչի և լուծույթի վրա։ Լուծույթները, որոնք Ռաուլի օրենքներին ենթարկվում են անկախ կոնցենտրացիայից և ջերմաստիճանից, կոչվում են իդեալական (կատարյալ)։ Իրական լուծույթների համար Ռաուլի օրենքներին կիրառելիս անհրաժեշտ է բաղադրիչների մոլային բաժինները փոխարինել նրանց ակտիվություններով, իսկ գոլորշիների ճնշումը՝ ցնդելիությամբ։ Մաքուր լուծիչի համեմատությամբ նոր լուծույթի եռման ջերմաստիճանի աճը ($\Delta t_{\text{եռ.}}$) և պնդեցման ջերմաստիճանի փոքրացումը ($\Delta t_{\text{սառ.}}$) ուղիղ համեմատական են լուծված նյութի մոլալ կոնցենտրացիային $(m)$՝ $\Delta t_{\text{եռ.}}=K_{\text{է}}m$ և $\Delta t_{\text{սառ.}}=K_{\text{կ}}m$։ $K_{\text{է}}$-ն և $K_{\text{կ}}$-ն կոչվում են լուծիչի էբուլիոսկոպիական և կրիոսկոպիական հաստատուններ։

Տես նաև

• Էբուլիոսկոպիա
• Կրիոսկոպիա

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 9, էջ 610)։