Պատշաճ արտադրական գործունեություն (ՊԱԳ)

Պատշաճ արտադրական գործունեությունը (ՊԱԳ) (անգլ. Good manufacturing practice), Դեղամիջոցների արտադրության և որակի հսկման պահանջների միասնական համակարգ է, սկսած հումքի գնումից մինչև պատրաստի արտադրանքի ստացում, ներառյալ արտադրանքի բաշխումը, հետարտադրական վերլուծությունները, բողոքներն ու հետկանչերը։ Այլ կերպ ասած հումքի գնումից մինչև սպառողին հասցնելու, և հետվաճառքային ողջ գործընթացի վերահսկողություն։ ՊԱԳ-ը հանդիսանում է GxP որակի ուղեցույցների և կանոնակարգերի մի բաղկացուցիչ մասը, որտեղ «X» - ը փոխարինվում է «M»- տառով նշանակում է արտադրություն (manufacturing): ՊԱԳ ուղեցույցները չեն նկարագրում, թե ինչպես արտադրել դեղը։ Նրանք հիմնական սկզբունքների ժողովածուներ են, որոնց պետք է հետևել արտադրության ընթացքում։ Այս կանոնակարգերն ունեն օրենքի ուժ և պահանջում են որակի տեսանկյունից մոտեցում արտադրությանը, ապահովելով նվազագույնի հասցնել աղտոտման, շփոթմունքների և սխալների ռիսկերը։ Նաև պաշտպանում են սպառողին` այնպիսի արտադրանք գնելուց, որն արդյունավետ և որակյալ չէ։ ՊԱԳ-ը ներկայացնում է պահանջներ այն ամենի նկատմամբ, ինչը կարող է ուղղակի կամ անուղղակի կերպով ազդել արտադրանքի որակի վրա՝ 1. Անձնակազմ 2. Տարածք 3. Սարքավորումներ (ներառյալ պարագաներ) 4. Հումք և փաթեթավորման նյութեր 5. Փաստաթղթեր 6. Արտադրություն 7. Որակի հսկում 8. Վալիդացիա 9. Պայմանագրով կատարվող աշխատանք 10. Բողոքներ և արտադրանքի հետկանչ 11. Ինքնատեսչական ստուգում։ Մշտական և կայուն որակով դեղորայքի արտադրությունն ապահովելու համար անհրաժեշտ է արտադրական ոլորտում ՊԱԳ համակարգի ներդրումը։ Դեղագործական արտադրանքները պետք է նախագծված և մշակված լինեն այնպես, որ բավարարեն Պատշաճ Արտադրական Գործունեության պահանջները։