«Միայնակ դաշնամուրը» (ռուս.՝ «Одинокий рояль»), խորհրդային տիկնիկային մուլտիպլիկացիոն ֆիլմ՝ ստեղծված «Սոյուզմուլտֆիլմ» կինոստուդիայում 1986 թվականին։ Առաջին ֆիլմերից մեկն է, որով մուլտիպլիկատոր Նատալյա Դաբիժան 1980-ական թվականներին սկսել է հանդես գալ որպես «Սոյուզմուլտֆիլմի» առաջատար ռեժիսոր[1]։
Մի տղա ուներ դաշնամուր, որը ոչ թե սովորական դաշնամուր էր, այլ իսկական ընկեր, որով ոչ միայն կարելի էր մեղեդի նվագել, այլև նրա հետ խաղալ ֆուտբոլ։ Ամեն ինչ լավ էր ընթանում մինչ այն օրը, երբ տղայի ծնողները որոշում են բաժանվել, իսկ դրանից հետո՝ փոխանակել բնակարանն ու վաճառել դաշնամուրը։ Այդ ժամանակ դաշնամուրը հեռանում է տնից։ Երկար ժամանակ նա թափառում է քաղաքի փողոցներում՝ նվագելով տարբեր մեղեդիներ, մինչև հանդիպում է կորած շնիկի։ Տղան այդ ժամանակ նույնպես թափառում էր քաղաքում՝ փնտրելով ընկերոջը, իսկ նրա ծնողները, որ արդեն հաշտվել էին, սկսում են փնտրել իրենց որդուն։ Ի վերջո նրանք բոլորը հանդիպում են միմյանց։
«Միայնակ դաշնամուրը» (1986) մուլտֆիլմն արժանացել է գեղարվեստական լավագույն լուծման համար մրցանակի Պորտուգալիայում կայացած միջազգային կինոփառատոնում (նկարիչ Արկադի Մելիք-Սարգսյան)[3]։