Հյուրանոց

Վիքիպեդիայից՝ ազատ հանրագիտարանից

Հյուրանոց, տվյալ բնակավայրը ժամանած քաղաքացիների ժամանակավոր բնակության շենք։ Ավտոտուրիստների հյուրանոցը կոչվում է մոթել։ Առաջին հյուրանոցները ստեղծվել են հին աշխարհի երկրներում, սովորաբար ուխտավայրերում, մայրուղիներին մոտիկ, խոշոր առևտրական կետերում։ Կապիտալիզմի զարգացմանը զուգընթաց կազմավորվել է քաղաքային հյուրանոցի ժամանակակից տիպը, որպես կենտրոնական նախասրահի, միջանցքների շուրջը դասավորված ննջարան-համարների, սպասասրահների, ռեստորանի ու օժանդակ սպասարկման սենյակների համակարգ։ ՍՍՀՄ-ում, 1950 թվականի վերջերին կառուցվել են հարմարավետ, բարձրորակ կահավորված ու սարքավորված բազմաթիվ հյուրանոցներ (օրինակ, Մոսկվայում «Ռոսիա»-ն՝ 6000 տեղով)։ Սովետական Հայաստանում առաջին հյուրանոցները կառուցվել են 1926—1932 թվականներին։ Երևանում՝ «Ինտուրիստ» (այժմ՝ «Երևան»), «Սևան» (երկուսն էլ կառուցվել է ճարտարապետ Ն. Բունիաթյանը) և Լենինականում՝ «Լենինական» (ճարտարապետ Դ. Չիսլյան), հետագայում՝ նաև Կիրովականում, Ղափանում, Ալավերդիում, Էջմիածնում և այլուր։ 1950—1970 ական թվականներին կառուցվել են Երևանում՝ «Արմենիա» (ճարտարապետ Մ. Գրիգորյան), «Անի» (ճարտարապետներ՝ Ֆ. Դարբինյան, Ֆ. Հակոբյան, Է. Սաֆարյան) և «Դվին» (ճարտարապետներ՝ Ա. Ալեքսանյան, Ֆ. Հակոբյան, Է. Սաֆարյան), Լենինականում (ճարտարապետ Դ. Դազազյան), Դիլիջանում (ճարտարապետ Հ. Աչյան), Ստեփանավանում (ճարտարապետ Շ. Սահակյան), Իջևանում (ճարտարապետ Պ. Թումանյան), Արտաշատում ( ճարտարապետ Ե. Մելիքյան) և այլն։

Արտաքին հղումներ[խմբագրել]

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Հայկական սովետական հանրագիտարանից, որի նյութերը թողարկված են Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։ CC-BY-SA-icon-80x15.png