Ավտոմոբիլային թանգարան (Բելգրադ)

Ավտոմոբիլային թանգարան
Տեսակ	թանգարան և մշակութային կառույց
Երկիր	Սերբիա
Տեղագրություն	Բելգրադ
Վայր	Բելգրադ
Հասցե	Мајке Јевросиме 3011000
Հիմնադրվել է	1994
Կայք	automuseumbgd.com(սերբ.)

Ավտոմոբիլային թանգարան (սերբ.՝ Музеј аутомобила), թանգարան Սերբիայի մայրաքաղաք Բելգրադում, որը համատեղ ստեղծվել է 1994 թվականին Բելգրադի քաղաքային խորհրդի որոշմամբ և ավտոմեքենաների հավաքորդ, Պալիլուլսկե շուկայի մոտ «Պետկովիչ» հին հրուշականոցի սեփականատեր Բրատիսլավ Պետկովիչի կողմից։

Նկարագրություն[խմբագրել | խմբագրել կոդը]

Թանգարանը տեղակայված է ռուս ճարտարապետ Վալերի Ստաշևսկու նախագծով 1929 թվականին կառուցված հին՝ Բալկաններում առաջին հանրային ավտոկայանատեղի վերանորոգված շենքում^[1]։

Թանգարանում պահվում է շուրջ հարյուր ավտոմեքենա՝ սովորական մարդատարից, շքեղից սկսած, մինչև մրցարշավային մեքենաներ, և դրանք բոլորը սարքին վիճակում են^[2]։ Ամենահինը 1897 թվականի ֆրանսիական «Մարոտ-կարդոն» եռանիվ մեքենան է։ Երեք անիվներով այդ փոխադրամիջոցն ունի փայտե թափք և երկու մարդու համար նախատեսված նստատեղեր։ Հավաքածուն ներառում է նաև փայտե անիվներով և Landolet տիպի շքեղ թափքով 1908 թվականի ֆրանսիական «Շարոնը»։ Հավաքածուում են նաև «Ֆորդի» 1925 թվականի T մոդելը, նույն թվականի «Լանչա Լամբդան», 1929 թվականի «Բյուիկ Օպերա» կուպեն, 1938 թվականի BMW 327/328-ը, և այլն։ Կա նաև 1957 թվականի «Կադիլակ», որով հաճախ է երթևեկել Իոսիպ Բրոզ Տիտոն։ Վերջին ցուցանմուշը 1978 թվականի «Ֆերրարին» է^[2]։

Ավտոմեքենաների թանգարանին են պատկանում նաև մի քանի տրանսպորտային միջոցներ (հիմնականում գերմանական պատերազմական ջիփեր), որոնք վարձակալությամբ տրվում են նկարահանումների համար^[2]։

Թանգարանում, բացի մեքենաներից, ներկայացված են նաև Սերբիայի ճանապարհային երթևեկության առաջին կանոնները և օրենքները, պետհամարանիշները, գործիքները, ավտոկանգառների հին ժամացույցները և երթևեկության ու ավտոտրանսպորտային ոլորտի գրականություն^[2]։

Ըստ թանգարանի ունեցած տվյալների՝ առաջին ավտոմեքենան Բելգրադ է ժամանել 1903 թվականի ապրիլին^[3]^[4]։