Փոլադլուի եկեղեցի
| Փոլադլուի եկեղեցի | |
|---|---|
| Հիմնական տվյալներ | |
| Երկիր |  Ադրբեջան |
| Տեղագրություն | Գետաբեկի շրջան, Փոլադլու |
| Ճարտարապետական ոճ | Հայկական |
Փոլադլուի եկեղեցի, ավերված հայկական առաքելական եկեղեցի Ադրբեջանի Հանրապետության Գետաբեկի շրջանի Փոլադլու գյուղի արևելյան մասում, պատմական Մեծ Հայքի Ուտիք նահանգի Գարդման գավառում։ Ըստ ճարտարապետական առանձնահատկությունների՝ թվագրվում է 16-17-րդ դարերով[1]։
Եկեղեցու անվանումը անհայտ է, այդ իսկ պատճառով կոչվում է բնակավայրի ներկայիս անվանումով։
Ճարտարապետություն[խմբագրել | խմբագրել կոդը]
Ունի միանավ բազիլիկ հորինվածք։ Կիսակլոր խորանի հյուսիսային և հարավային կողմերից կից են ուղղանկյուն հատակագծով թաղակապ ավանդատներ։ Վերջիններս իրենց ծավալներով դուրս են աղոթասրահի բուն մակերեսից, սակայն կառուցվել են եկեղեցու հետ։ Արտաքին չափերն են՝ 13,20 x 5,65 մ, արևելյան պատն ավանդատների հետ՝ 9,65 մ։ Եկեղեցու մուտքերը երկուսն են՝ հարավից և արևմուտքից։ Հարավային ավանդատունը եկեղեցու հետ հաղորդակցվում է խորանի մեջ բացված նեղ ու երկար մուտքով։ Հյուսիսային ավանդատան մուտքը բացվում է անմիջապես աղոթասրահի մեջ։ Նեղ ու դեպի ներս (լայնացող) պահպանված լուսամուտները երեքն են՝ բոլորն էլ բացված արևելյան ճակատից։ Կառուցված է անմշակ ու կոպտատաշ քարով, կրաշաղախով։ Անկյունաքարերի մի մասը սրբատաշ է։ Պատերը պահպանվել են 1,5-2 մ բարձրությամբ։ Ամբողջովին քանդված են եկեղեցու տանիքը և թաղը, ավանդատների երեսպատման քարերը, մուտքերի անկյունաքարերը։ Շարվածքում կան խաչապատկերներ կրող քարաբեկորներ[1]։
Եկեղեցու շուրջ տարածվում է հին գերեզմանոց, ուր հանդիպում են գետնաթաղ ու կոպտատաշ սալատապաններ, որոնցից շատերը զարդարված են հնաոճ ու պարզ խաչաքանդակներով[1]։